Millimizin üzvü AFFA-nın mükafatları kəsdiyini etiraf etdi (ÖZƏL)

Dünən Sportal.az saytında 21 yaşadək futbolçulardan ibarət milli komandamıza Norveç üzərində qələbəyə görə vəd olunan mükafatın verilmədiyi barədə xəbər yer almışdı. Məlumatda qeyd olunurdu ki, AFFA rəhbərliyi əvvəlcədən U-21-ə qələbəyə görə 15 min manat mükafat vəd etsə də, həmin pulun cəmi 4 mini verilib.

Futbolxeber.az saytı məsələni dəqiqləşdirmək üçün bəzi milli üzvlərinə müraciət etsə də, adını çəkmək istəmədiyimiz bir neçə yığma üzvü faktı təsdiqləmək üçün özündə cəsarət tapmadı. Amma...Andrey Popoviç istisna olmaqla. Daim səmimi etirafları ilə diqqət çəkən milliləşən ukraynalı bu dəfə də sözün düzünü dedi: "Bəli, bizə hələlik yalnız 4 min veriblər. Amma pulumuz kəsilməyib. Qalan hissəsini də ödəyəcəklər. Sadəcə olaraq, AFFA rəhbərliyi indi ölkə xaricindədir. Belə olan halda pulun qalan hissəsini necə verə bilərlər?"

Təki elə olsun, qalan hissəsini də versinlər. Amma maraqlı məqam odur ki, nəyə görə mükafat komandaya birdəfəlik ödənilməyib? Məgər, 15 min AFFA-dakılar üçün böyük rəqəmdi? Yoxsa, olmaya SOCAR-ın pulu qurtarıb?