Millimizin keçmiş baş məşqçisi: "Azərbaycanla oynamaq istəyən yığma komandalar azlıq təşkil edir"

"Hazırda Azərbaycan millisi ilə oynamaq istəyən yığma komandalar azlıq təşkil edir. Bu səbəbdən də AFFA-nın seçimini anlayışla qarşılamaq lazımdır". Futbolxeber.az saytına verdiyi açıqlamada bu sözləri yığmamızın keçmiş, "Rəvan"ın hazırki baş məşqçisi Şahin Diniyev deyib.

Təcrübəli mütəxəssis millimizin Qırğızıstana qarşı keçirəcəyi oyunun yalnız reytinq xalı baxımından əhəmiyyət kəsb etdiyini bildirib: "Hər bir komanda güclü rəqib axtarır. Bu oyunlarda qələbə qazanmaq yalnız reytinq baxımından önəmlidir. Amma indiki məqamda bu cür oyunun nə dərəcədə önəmli olduğu barədə dəqiq fikir bildirmək çətindir. Çünki vaxt uyğunluğu yoxdu. Yəni, bizim üçün tsikl artıq başa çatıb. Növbəti tsiklin başlamasına isə hələ 8-9 ay vaxt var. Odur ki indidən eksperiment edib, millinin gələcək heyətini formalaşdırırıq demək də düzgün deyil".