Sumqayıtlı millət vəkili “Sumqayıt”ın uğuru barədə: “Hər birimiz qürurluyuq”

“Bizim üçün iki əsas məsələ var. Birincisi, komandamızın yüksək səviyyədə olmasıdır. Bunu oyunlarda gördük”.

Futbolxeber.az saytına açıqlamasında bu sözləri 44 saylı Sumqayıt-Xızı seçki dairəsindən milət vəkili seçilən Müşfiq Məmmədli “Sumqayıt”ın UEFA Konfrans Liqasına vəsiqə qazanması barədə danışarkən deyib.

Millət vəkili bildirib ki, ikinci məsələ infrastrukturun yüksək səviyyədə olmasıdır: “Sumqayıt stadionunu, oradakı insanların qələbə sevincini, coşqusunu özünüz də görmüsünüz. Bütün bunlar ölkə rəhbərliyinin, cənab Prezidentin Sumqayıta, sumqayıtlılara, idmana, o cümlədən də, Sumqayıt idmanına verdiyi önəmin, dəstəyin bir hissəsidir”.

M.Məmmədli Milli Məclisdə təmsil etdiyi Sumqayıtın futbol klubunun Avropada təmsil olunmasına görə qürurlandıqlarını bildirib: “Aparılan düzgün iş mövsümün sonunda bayram yaşanmasına səbəb oldu. Sumqayıtlıların coşqusu, komandanın çalışqanlığı “Sumqayıt”ı Avropaya apardı. Gözəl nəticədir. Buna görə hər birimiz sevinirik, hər birimiz qürurluyuq. Həm “Sumqayıt” klubuna, həm İcra Hakimiyyətinə, həm də ölkə rəhbərliyinə dərin minnətdarlığımızı bildiririk. Arzu edirəm ki, nəinki Sumqayıtda, ölkəmizin bütün regionlarında futbol, idman daha da inkişaf etsin”.

Fərəc ASLANOV