“ÇL-də əvvəlkilərdən daha yaxşı nəticə göstərəcəyimizə ümid edirəm”

“Qarabağ” ailəsinin üzvü olduğum üçün çox şadam. Təəssüratlarım əladır. Şükürlər olsun ki, növbəti çempionluğumuzu qazandıq. İnanıram ki, gələn il də birinci olacağıq. Eləcə də Çempionlar Liqasından əvvəlkilərdən daha yaxşı nəticə göstərəcəyimizə ümid edirəm”.

Futbolxeber.az saytına müsahibəsində bu sözləri “Qarabağ”ın müdafiəçisi Abbas Hüseynov deyib.

O, sona 8 tur qalmış çempion olmaqlarının “Qarabağ”ın güclü və ya rəqiblərin zəif olması ilə əlaqələndirməyib: “Futbolda belə anlayış yoxdur. Elə oyunlar olub ki, uduzmuşuq, yaxud heç-heçə etmişik. Hətta bəzən TOP klublar da gözlənilməz məğlubiyyətlə üzləşirlər. Məsələn, “Liverpul” kimi komanda öz meydanında “Atalanta”ya 0:3 hesabı ilə uduzdu”.

29 yaşlı futbolçu bildirib ki, müasir futbolda uğur qazanmaq üçün iki əsas amil var: “Mənim fikrimcə, indiki dövrdə futbolda əsas olan istək və əzmkarlıqdır. Bu ikisi varsa, yaxşı nəticə qazanacaqsan. Qurban müəllim bizə həmişə deyir ki, istəkli olun, ürəkdən oynayın, əzmkar mübarizə aparın. Əziyyət çəkirsənsə, artıq məşq edirsənsə, Allah sənə bunun əvəzini yetirir”.  

A.Hüseynov qarşıdakı kubokun finalı barədə də danışıb: “Zirə” hazırda çox yaxşı formadadır. Özü də final cəmi 1 oyundan ibarətdir. İnanıram ki, kuboku qazanacağıq. Düzdür, çətin olacaq. Çünki Rəşad Sadıqov komandasını final üçün əla motivasiya edəcək”.  

“Qarabağ”ın müdafiəçisi avrokuboklara vəsiqə qazandıqları üçün “Zirə”nin baş məşqçisini təbrik edib: “Rəşad Sadıqovu təbrik edirəm. Mən “Qarabağ”da onunla birgə oynamışam. Sadıqovun ikinci yeri tutmasına sevindim. Amma bunun finaldakı mübarizəyə aidiyyəti yoxdur. Çünki mən “Qarabağ”ın futbolçusuyam və finalda qalib gəlib mövsümü “qızıl dubl”la başa vurmaq istəyirəm”.

İbrahim CƏFƏROV