“Araz-Naxçıvan”ın qapıçısı: “Avrokuboklar şansımız olmasa da, qürurumuz var”

“Araz-Naxçıvan”ın qapıçısı Kristian Avramın Futbolxeber.az saytına müsahibəsi

- Azərbaycan Premyer Liqasının 29-cu turunda “Kəpəz”ə qarşı keçirilən oyunda fasiləyə hesabda üstün yollansanız da, yekunda məğlub oldunuz. Nə baş verdi ki, matçın gedişatı tam dəyişdi?

- Nə baş verdiyini bilmirəm. Təbii ki, məyusedici məğlubiyyətdir. “Kəpəz”lə matçda 3 xal bizim üçün çox vacib idi. Oyuna da yaxşı başladıq, hesabda önə keçdik. Lakin sonradan niyə zəif çıxış etdiyimizin səbəbini bilmirəm.

- Bu məğlubiyyətdən sonra demək olar ki, “Araz-Naxçıvan” avrokuboklara yollanmaq şansını böyük ölçüdə itirdi?

- Şanslar barədə bir söz deyə bilmərəm. Məqsəd hər zaman meydana çıxıb qələbə qazanmaqdır. Hər oyuna 3 xal üçün çıxırıq. Mövsümün sonuna kimi hələ 7 tur var. Hər şeyin necə yekunlaşacağını birlikdə görəcəyik.

- Qarşıdakı oyunlar üçün motivasiyanı hardan tapacaqsınız?

- Biz hər birimiz peşəkarıq. Avrokuboklar şansımız olmasa belə, qürurumuz var. Meydana çıxıb öz işimizi görməliyik. Siz futboldan yazırsınız. Çempionatda fasilə olanda işinizi dayandırmırsınız ki. Eynən də biz.

- “Araz-Naxçıvan” mövsümə yaxşı start vermişdi. Yanvara qədər hətta “Neftçi”, “Qarabağ” kimi iddialılara qalib də gəlmişdiniz. Qış fasiləsində nə baş verdi ki, komanda bu cür gerilədi?

- Heç bilmirəm nə deyim. Belə görünür ki, nəsə qaydasında deyil. Hansısa məqamı nəzərdən qaçırmışıq. O da bizə nəticə qazanmağa imkan vermir.

- Mətbuatda komandada maliyyə problemləri olduğu barədə xəbərlər yayılıb. Bəlkə zəif çıxışın səbəbi məhz budur?

- Mətbuatda çox şey yazılır. Lakin komandada atmosfer yaxşıdır. Maliyyə baxımından da hər hansı problem yoxdur. Deyilən vaxtda maaşları da, bonusları da alırıq.

- Növbəti turda “Neftçi”nin qonağı olacaqsınız. Bu matçdan gözləntiləriniz nədir?

- İndi ilk növbədə bərpa olmalıyıq. Daha sonra “Neftçi” ilə matça hazırlaşacağıq. Məşqçilər korpusu da lazımi göstərişləri verəcək. İnanıram ki, “Neftçi” ilə görüşdə uğurlu nəticə əldə edə biləcəyik. Bu mövsüm artıq 2 dəfə onlara qalib gəlmişik. Qarşıdakı matçda da uğur qazanmaq üçün əlimizdən gələni edəcəyik.

Fərəc ASLANOV