“Zirə”nin yarımmüdafiəçisi millimiz haqda düşünmür: “Olimpiadada oynamaq xəyalımdır”

“Zirə”nin yarımmüdafiəçisi Eldar Quliyevin Futbolxeber.az saytına müsahibəsi

- Azərbaycan kubokunun yarımfinal mərhələsinin ilk oyununda “Qəbələ” üzərində 2:1 hesablı qələbə qazandınız. Rəqibin sona yaxın vurduğu qol “Zirə”nin final şansını nə qədər çətinləşdirdi?

- Bu qolun hər hansı çətinlik yaradacağını düşünmürəm. Oyundan sonra baş məşqçimiz də bildirdi ki, bu qolun bizə ziyanından çox xeyri olacaq. Belədə daha diqqətli oynayacağıq. Çünki matç 2:0 bitsəydi, səfər matçına bir qədər arxayın çıxa bilərdik. Necə ki, ev oyununda ikinci qolu vurduqdan sonra meydanda sanki dayandıq. Rəqib də bundan istifadə etməklə fərqləndi.

- Kubokda finalın bir addımlığındasınız, çempionatda isə sona 8 tur qalmış üçüncü pillədə qərarlaşmısınız. Sizcə, hansı turnirdən avrokuboklara vəsiqə qazanmaq şansınız daha çoxdur?

- Prinsipcə, buna hansı turnirdən nail olmağın ciddi fərqi yoxdur. Əsas odur ki, qitə kuboklarına yollana bilək. Maksimum gücümüzü sərf edəcəyik ki, hər iki turnirdə istəyimizə çataq. Məqsədimiz çempionatda ikinci olmaq, kubokda isə final oynamaqdır.

- Finala çıxsanız, rəqib böyük ehtimalla, “Qarabağ” olacaq...

- Hələ finaldan danışmaq tez olar. Çünki biz ora vəsiqə qazanmamışıq. Ümumi götürdükdə, bəli, “Qarabağ”a qarşı oynamaq hər zaman çətindir. Bu komandanın gücü hər kəsə məlumdur. Lakin finalda istənilən nəticə qeydə alına bilər.

- Azərbaycan millisinə dəvət almağınız gözlənilsə də, bu günlərdə Ukrayna U-23 yığmasında forma geyindiniz. Demək olar ki, artıq seçiminizi etmisiniz?

- Bu barədə çox müzakirə gedib. Mənə Azərbaycan millisində oynamaq təklifi çox gəlib. Lakin hər zaman cavabım eyni olub - mən Ukrayna millisində oynamaq istəyirəm. Azərbaycan yığmasının təklifi çox xoşdur.

- Məsələ artıq tam qapanıb, yoxsa fikrinizi dəyişmək ehtimalı var?

- Sabah nə baş verəcəyini heç birimiz deyə bilmərik. Amma hələ ki, Azərbaycan yığmasında forma geyməyi düşünmürəm.

- Seçiminizə olimpiadaya yollanmaq ehtimalı nə dərəcədə təsir edib?

- Təbii ki, olimpiadada oynamaq hər futbolçunun arzusudur. Bu, mənim xəyalımdır. Özü də Ukrayna millisi tarixində ilk dəfə Olimpiya Oyunlarına vəsiqə qazanıb. Bu tarixə düşməyi hər kəs arzulayır. O cümlədən də mən Parisdə keçiriləcək olimpiadaya yollanmağı çox istəyirəm.

Fərəc ASLANOV