Adil Şükürov: “Komandamdan heç vaxt müdafiədə oturmağı istəmirəm”

“Çox şadam ki, bu qələbə sayəsində bütün “Kəpəz” azarkeşlərini sevindirə bildik. Bu gün iki fərqli hissə izlədik. Əslində, matça yaxşı başlamışdıq. İlk qol epizodunu da biz yaratmışdıq. Lakin sonradan uşaqlarda sanki arxayınçılıq yarandı. Bunun da nəticəsində qapımızda qol gördük”.

Futbolxeber.az saytının məlumatına görə, bu sözləri “Kəpəz”in baş məşqçisi Adil Şükürov Azərbaycan Premyer Liqasının 29-cu turunda “Araz-Naxçıvan” üzərində qazanılan 2:1 hesablı qələbəni şərh edərkən deyib.

O, ikinci hissədə geridönüş etdiklərini bildirib: “Fasilədə futbolçularla söhbətimiz oldu. Onlara lazımi tapşırıqları verdik. Sağ olsunlar, futbolçular da ikinci hissədə toparlandılar. Lazım olan qolları vurmaqla qələbə qazandıq”.

A.Şükürov fasilədə futbolçularına konkret hansı tapşırıqlar verdiyini də açıqlayıb: “Uşaqlardan daha çox irəli oynamağı istəyirdik. Bunun nəticəsində rəqib qapısında təhlükə yarada bilirdik. Onlar da sağ olsunlar ki, hər şeyi başa düşdülər və lazımi nəticəni qazandıq”.

O, “Qəbələ”nin deyil, yalnız öz çıxışları barədə düşündüklərini vurğulayıb: “Futboçularla danışanda da bildiririk ki, “Qəbələ”nin oyunu barədə düşünmək istəmirik. Əsas odur ki, futbolçularımız istədiklərimizi meydanda yerinə yetirsinlər. Mən komandamdan heç vaxt müdafiədə oturmağı, yaxud rəqibə üstünlük verməyi istəmirəm. Oyun üslubumuz var, ondan geri çəkilməməliyik. Əksinə, oyun üslubumuzu daha da yaxşılaşdırmaq istəyirik”.