Şahin Diniyev: "Qarabağ"la başabaş oynayan komandayıq"

"Zirə"ni təbrik edirəm. Layiqli qələbə qazandılar. Bunu qəbul etmək lazımdır. Bunlardan dərs çıxarmalıyıq. Oyunun qırılma nöqtəsi 3-cü dəqiqə oldu. Təsadüfi və sadə qol buraxdıq. Taktiki sistem ondan sonra qırıldı. Mütləq irəli getməliydik".

Futbolxeber.az saytının məlumatına görə, bu sözləri "Səbail"in baş məşqçisi Şahin Diniyev Azərbaycan kubokunun 1/4 final mərhələsinin cavab görüşü çərçivəsində "Zirə"yə 0:3 hesabı ilə məğlub olaraq mübarizəni dayandırdıqları oyundan sonra mətbuat konfransında deyib.

O, oyunu belə şərh edib: "Təmkinlə yox, emosiolarla irəli getdik. Yadıma gəlmir ki, bir oyunda bu qədər qol epizodu yaradaq. Bir qol vursaydıq, bəlkə vəziyyəti dəyişərdik. Hücumda oynamağa çalışdıq. Rəşad Sadıqov düzgün taktika quraraq, bizi əks-hücumlarda tutdu. 3-cü dəqiqədə buraxılan qol planları pozdu. Futbolçular istəkli idi. Bu qədər epizoddan istifadə etməmək nəticəyə təsir edəcək. Çempionata köklənməliyik. Finala qədər getsəydik də, çətin olacaqdı. Yeni oyunçular tam adaptasiya olmasalar da, keyfiyyətli oyunçulardır".

Baş məşqçi komandanın aparıcı hücumçularından olan Pedro Nunonusonradan meydana buraxmağının səbəbini də izah edib:  "Nə Madini, nə Masikeni, nə də Alluşu hazırlıq matçlarında görməmişəm. Onların potensiallarına baxmaq üçün meydana buraxdım. Pedronu tanıyıram. Çempionatdakı oyunlar üçün vacib idi ki, Madi, Masike və Alluşun tam gücünü bilək. Pedro özünü sübut etmiş oyunçudur. Deməzdim ki, kuboku çempionata qurban verdik. Kubokda da oynamaq istəyirdik. Alınmadı. Çox bəsit qollar buraxırıq. Müdafiədə çox pis oynayırıq. "Qarabağ"la oyuna baxıram, müdafiədə çox yaxşı idik. Məcburiyyətdən irəli getdik. Fərdi səhvlər çox idi. Futbolçuların üstünə də getmək olmaz. Onlara dəstək olmalıyıq. Günahkar mənəm, futbolçuların arxasındayam. Komanda uduzubsa, məsuliyyət məndədir".

Ş.Diniyev komandasının Premyer Liqadakı mübarizəsindən də danışıb: "Xoşuma gəlməyən ruhdan düşən insandır. Yıxılmamışıq. Komandamın oyunu və sistemi var. "Zirə" bu gün mərkəzi keçə bilmirdi. Futbolçuların işə yanaşmasına görə də, auramı korlamıram. Çempionatın əvvəlində üç oyundan sonra 1 xalımız var idi. Bomba bir yerə iki dəfə düşmür. Amma yenə düşə bilər. Zədəlilərimiz oldu. Çempionatın son üç oyunundan sonra yenə bir xal toplamışıq. Komandada hələ çox şeylər görəcəksiniz. Düzgün yoldayıq".

Diniyev komandasının çox inkişaf etdiyini də qeyd edib6 "Mənim üçün şəxsi müqavilədən daha çox komandanın uğuru öndədir. Heç vaxt qorxmamışam. Savadımı əlimdən ala bilməzlər. Əsas odur. Hər bir məşqçinin çamadanı yanında olmalıdır. Komandaya inamım böyükdür. Keçənilki "Səbail" deyilik. "Qarabağ"la başabaş oynayan komandayıq. Uğursuzluq çox çəkməyəcək. Bəhanələrim yoxdur. Bu kollektiv "Səbail"i irəli aparacaq".