“Səbail” Avropa çempionunu transfer etdi

"Səbail” növbəti transferini reallaşdırıb.

Futbolxeber.az saytının əldə etdiyi məlumata görə, paytaxt klubu Suliman Alluşu heyətinə qatıb.

22 yaşlı Mərakeş əsilli hücumçu Amsterdamda anadan olub. Həm Mərakeş, həm də Niderland vətəndaşlığı olan Alluş futbolda ilk addımlarını “Ayaks”da atıb.

Daha sonra “AZ Alkmaar”a üz tutan forvard 2019-2023-cü illər aralığında bu klubun gənclər komandasında forma geyib. Ötən il isə o, “Venlo”ya transfer olunub. Burada Suliman Alluş 28 matçda 4 qol vurub.

“Səbail”in yeni transferi Niderlandın aşağı yaş qrupları üzrə milli komandalarında da forma geyib. 2019-cu ildə Alluş U-17-lər arasında Avropa çempionu olub. İrlandiyada keçirilən 17 yaşlıların qitə birinciliyinin finalında Niderland millisi İtaliyanı 4:2 hesabı ilə məğlub edib.

Qeyd edək ki, Alluş artıq "Səbail"in düşərgəsinə qoşulub.