Azər Bağırov: "Yaxşı qurtardıq" düşüncəsi bizlik deyil"

“Çətin oyun oldu. Son üç gündə demək olar ki, məşqçi heyəti olaraq stresdəydik. Qrip virusuna yoluxmuşduq. Çətinliklərimiz oldu”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Azər Bağırov Azərbaycan kubokunun 1/4 final mərhələsində “Qəbələ”yə qarşı keçirilən ilk oyundan (1:1) sonra deyib.

O, say üstünlüyünə malik olsalar da, qalib gələ bilməmələrinə belə münasibət bildirib: “İstəyərdik ki, qalib gələk. Amma alınmayanda, alınmır. Hücumda olan gedişlar alınmadı. Üzülməyə dəyməz. Hər şey irəlidədir, heç nə bitməyib. İkinci hissə Qəbələdə olacaq”.

O, komandasının üzvü Aksel Nqando şans qazanmamasının səbəbini belə izah edib: “Rəqabət məsələsi deyil. Akselin meydanı yaxşı görmək qabiliyyəti var. Monoton oyunçudur, amma çox ağıllı görür. Ona güvənirəm”.

"Qarabağ" "Sabah"ı 7:1 hesabı ilə məğlub etdi, siz "Qarabağ"a 1:3 uduzmuşduz. Dünənki matçdan sonra düşündünüz ki, yaxşı qutarmısız?” sualını Bağırov belə cavablandırıb: “Yox, belə düşünmürəm. Əlbəttə ki, futbolda 6:1, 7:1 nəticələri də ola bilər. "Qarabağ"a qarşı üç oyun keçirmişik və futbolçular hamısında vuruşublar. Son matçda da Orxan epizodu vursaydı, başqa cür ola bilərdi. Futboldur da, şanssızlıq da yaşayırsan. Şanslı vaxtlarımız qarşıdadır. Bu gün də penaltini vursaydıq, oyun fərqli məcrada keçərdi. Yaxşı qurtardıq düşüncəsi bizlik deyil”.