Ayxan Abbasov: “Bu istirahətə ehtiyacımız var idi”

"Yanvarın 3-dən Türkiyədə məşqlərə başlamışıq. Legionerlər ayın 6-dan komandaya qoşulub. Futbolçular istirahətdən gəliblər. Hazırlığımız yaxşı keçir. Çempionatımızın gərginliyinə baxanda bu istirahətə ehtiyacımız var idi”.

Futbolxeber.az saytına açıqlamasında bu sözləri “Turan Tovuz”un baş məşqçisi Ayxan Abbasov deyib.

O, hazırda heyətlə bağlı problem yaşamadıqlarını bildirib: “Sevindirici haldır ki, heyətimizdə hər hansı bir itki yoxdur. Komandada hər kəs sağlamdır”.

Tovuz klubunun çalışdırıcısı transfer çalışmalarına da toxunub: “Hələ ki transfer etməmişik. Axtarışlarımız davam edir. Danışıq apardığımız futbolçular var. Amma nəzərə almaq lazımdır ki, qışda transfer etmək çətindir”.

A.Abbasov qeyd edib ki, hansısa futbolçunun baxışa gəlməsini istəmir: “Baxış istəmirik. Hansısa çoxdan oynamayan, bizim diqqətimizi cəlb edən futbolçu olsa, müqavilə bağlayıb heyətə cəlb edə bilərik”.

Qeyd edək ki, “Turan Tovuz” sabah toplanış çərçivəsində ilk yoxlaa oyununa çıxacaq. Ayxan Abbasovun komandası Rumıniya yüksək liqa təmsilçisi “Voluntari”  ilə üz-üzə gələcək.

Azad NURİYEV