Marko Veşoviç: “Bu 3 xal üzümüzü güldürür”

“İlin son matçı olsa da, olduqca ağır keçdi. "Zirə"nin bizə qarşı belə oynayacağını bilirdik”.

Futbolxeber.az saytına müsahibəsində bu sözləri “Qarabağ”ın müdafiəçisi Marko Veşoviç Azərbaycan Premyer Liqasının XVIII turunda “Zirə”yə 1:0 hesabı ilə qalib gəldikləri oyun barədə danışarkən deyib.

Monteneqrolu futbolçu qoldan sonra daha rahat oynadıqlarını bildirib: “Rəqib oyun ərzində çox aqressiv oynadı. Bizə qarşı iki müdafiə bloku qurmuşdular. Matç ərzində bu müdafiəni yarmaq üçün fürsətlər axtardıq. Hesabı vaxtında aça bildik. Bu qoldan sonra hər şey bizim üçün daha rahat keçdi. "Zirə" ikinci hissədə də hücumlarını davam etdirdi. Olduqca təhlükəli vəziyyətlər yarada bildilər. Bu 3 xal bizim üçün vacib idi və onu əldə edə bilməyimiz üzümüzü güldürür. Hazırda ikinci yerlə xal fərqimiz daha da böyüdü”.

Veşoviç qış fasiləsinə 12 xallıq fərqlə yollanmalarına belə münasibət bildirib: “Bu nəticəni qazanmaq üçün hər oyunda bacarığımızın ən yaxşısını ortaya qoyurduq. Düşünürəm ki, bu mövsüm çox gözəl performans göstəririk. Həm Premyer Liqada, Azərbaycan Kubokunda, həm də avrokuboklarda. Hər üç cəbhədə bu cür sabit çıxış etmək heç də asan deyil. Ona görə qazandığımız nəticələr bizi sevindirir. Yaxşı bir istirahətə layiqik”.

32 yaşlı müdafiəçi qış fasiləsinin bir o qədər də uzun olmadığını vurğulayıb: “Yanvarın 5-dən etibarən yenidən qızğın hazırlıqlara başlayacağıq. Əminik ki, bizi "Braqa"ya qarşı 2 maraqlı matç gözləyir. Bu matçlarda maksimum performans göstərmək üçün olduqca yaxşı hazırlaşacağıq”.

Marko Veşoviç Xankəndində MOİK-ə qarşı keçirdikləri tarixi oyundan da bəhs edib: “Həmin matç tarixi əhəmiyyət daşıyırdı. MOİK-lə görüşün xalq, ölkə üçün hansı mahiyyətə malik olduğunu bilirəm. Xankəndində qələbə qazanmaq da çox xoş idi. Həmin gün stadionda inanılmaz atmosfer var idi. Oradan ən xoş təəssüratlarla qayıtdım”.

Azad NURİYEV