“Kəpəz”in kapitanı: “Neftçi” layiqli qələbə qazandı”

“Kəpəz”in kapitanı Yeqor Xvalkonun Futbolxeber.az saytına müsahibəsi

- İlin son oyununda “Neftçi”yə 0:2 hesabı ilə uduzduz. Bu yenilgini necə şərh edərdiz?

- Yaxşı oyun alındı. Rəqib matça aktiv başladı. Erkən qol da vurdular. Biz gedişatı dəyişmək üçün çalışırdıq. Düzdür, bir epizodda hesabı bərabərləşdirsək də, hakim ofsayt qeydə aldı. Nə etmək olar? Artıq mövsümün ikinci yarısını düşünməliyik. Hesab edirəm ki, qışdan sonra daha yaxşı çıxış edəcəyik.

- Nəticəni ədalətli saymaq olar?

- Məncə, olar. “Neftçi” layiqli qələbə qazandı. Çünki bizdən fərqli olaraq onlar yaxaladıqları qol şanslarını dəyərləndirdilər. Biz isə yox. Düşünürəm ki, bu amil həlledici oldu.

- Həqiqətən də “Neftçi” ilə matçda “Kəpəz” xeyli qol şansı yaxalasa da, onlardan istifadə etmədi. Bunu nə ilə əlaqələndirmək olar?

- Həqiqətən də elədir. Yəqin ki, bizim günümüz deyildi. Məsələn, “Qəbələ” ilə matça istədiyimiz hər şey alınmışdı. Demək olar ki, yaxaladığımız bütün şansları dəyərləndirmişdik. Lakin “Neftçi” ilə matçda bir dəfə belə fərqlənmək mümkün olmadı. Rəqibi də nəzərə almaq lazımdır. “Neftçi” kifayət qədər güclü rəqibdir.

- Hakimlərin idarəçiliyindən nə dərəcədə razı qaldız?

- Hər şey normal idi. Düzdür, bizim qolu hesaba almadılar. VAR-da epizodun təkrarına bir neçə dəqiqə baxdılar. Açığı, mən həmin yerdən aralı idim. Ona görə dəqiq nəsə deməyim düz çıxmaz. Amma hesab edirəm ki, VAR-da baxıblarsa, yəqin düzgün qərar qəbul ediblər.

- Deyə bilərik ki, Adil Şükürovun gəlişindən sonra “Kəpəz” daha yaxşı oynamağa başlayıb?

- Mütəxəssislər, oyunlarımızı izləyən azarkeşlər hər şeyi görür. Adil Şükürovun gəlişindən sonra əksər matçlarımız uğurlu alınıb. Lakin bundan da yaxşısına qadirik.

- Baş məşqçinin mövsümün ortasında komandaya gəldiyini nəzərə alsaq, yəqin ki, fasilə “Kəpəz”in xeyrinə olacaq.

- Mən də belə düşünürəm. İstirahətdən sonra yaxşı hazırlıq keçəcəyik. İnanıram ki, mövsümün ikinci yarısında nəticələrimiz daha da yaxşılaşacaq. Əlimizdən gələni edəcəyik ki, mövqeyimizi daha da yaxşılaşdıraq və azarkeşlərimizi sevindirək.

İbrahim CƏFƏROV