Mutu məğlubiyyətdən sonra həmkarına söz atdı: “Bu, ucuz şoudur”

"Bizim üçün çətin oyun oldu. Matça istədiyimiz kimi başladıq. İkinci yarıda rəqib komanda qapımıza qollar vurdu. Sonluq da hamıya bəllidir".

Futbolxeber.az saytının məlumatına görə, bu sözləri “Neftçi”nin baş məşqçisi Adrian Mutu Azərbaycan Premyer Liqasının XIII turunda “Sumqayıt”a 1:2 hesabı ilə uduzduqları oyundan sonra deyib.

Rumın mütəxəssis məğlubiyyətə səbəb göstərməkdə çətinlik çəkib: “Bilmirəm, sizə nə deyim. Fürsət yaranır ki, qalib gələk, bir addım da irəli gedək, amma bunu bacara bilmirik. Hələ də başa düşə bilmirəm ki, necə olur, bu komanda səfərdə qalib gəlir, evdə eyni nəticəni təkrarlaya bilmirik. Başa sala bilmirəm, nə baş verir. Səfərdə 14 xal qazanmışıq. Halbuki həm ev, həm də səfərdə tələblərimiz eyni olur. Deyim ki, evdə azarkeş amili rol oynayır, təzyiq var, xeyr, bu da yoxdur. Çalışacağıq ki, bunların öhdəsindən gələk. Səfər oyunlarında işləri istədiyimiz kimi alındıra bilirik. Xüsusən də, təcrübəli oyunçulardan, hücumdakı futbolçulardan daha artığını gözləyirəm. Oyunboyu duellərin hamısında uduzduq. Bəlkə də məhz buna görə məğlub olduq”.

O, növbəti dəfə zamana ehtiyac duyduqlarını bildirib: “Demişdim ki, yeni komanda qurulur, yeni komandada enişli-yoxuşlu gedir hər şey, nəticələr də fərqli ola bilər. Hazırda başa düşə bilmirəm ki, nə baş verir. Ev və səfər oyunlarımız arasında böyük fərq var. Əksinə olmalıdır. Çünki evdə oynayırsan, doğma meydançandır, özünü daha çox qorunmuş hesab etməlisən. Məni bu amil narahat edir. Futbolçuları da həmçinin. Onlar başa düşməlidir ki, "Neftçi" kimi komandada oynayırlarsa, daha çoxunu verməlidirlər. Görünür ki, bu, kifayət etmir”.

Mutu futbolçularının həmkarı tərəfindən təhqir olunduqlarını vurğulayıb: “Oyunçularım Samir Abasov tərəfindən davamlı olaraq təhqir olunurdu. Bu, ucuz şoudur. Bunu şərh etmək istəmirəm. İlk dəfə deyil ki, təkrarlanır. Sumqayıtda da rəqibin baş məşqçisi belə edirdi. Ucuz şoudur. Baş məşqçidir, nümunə olmalıdır oyunçulara. Rəqibə təhqirlərdən istifadə etməməlidir. Futbol fair-pleyi sevir. Qalib də gəlmək olar, uduzmaq da. Əsas odur ki, bunu necə edirsən”.

O, məsuliyyəti üzərinə götürdüyünü bildirib: “Hamı bilir ki, biz mövsümə necə başlamışıq. Mənə vaxt lazım idi ki, liqanı tanıyım. Çempionatla tanışam. Məsuliyyəti tam olaraq öz üzərimə götürürəm. Hamının gözləntiləri çoxdur. Bizim istəklərimiz də daha çoxdur. Edə biləcəyimiz yeganə məsələ işləməkdir. Bu vəziyyətdən dönüş yarada bilərik”.

“Neftçi”nin çalışdırıcısı azarkeşlər tərəfindən istefaya səslənməsinə belə münasinət bildirib: “Onlar öz fikirlərini ifadə etməkdə sərbəstdirlər. Bu barədə bir söz deyə bilmərəm. Əgər kimsə düşünür ki, ən böyük problem məndədir, onlar fikirlərini ifadə etməyə sərbəstdirlər. Bütün məsuliyyəti üzərimə götürürəm”.