Minifutbol Federasiyasının baş katibi: “Ümid edirəm ki, vətənə çempion kimi qayıdacağıq”

“Milli komandamız tarixində ilk dəfə dünya çempionatına qatılır. Lakin millimiz son Avropa çempionudur. Ona görə də hədəfimiz statusumuza uyğundur”.

Futbolxeber.az saytının məlumatına görə, bu sözləri Azərbaycan Minifutbol Federasiyasının baş katibi Orxan Hüseynov millimizin Birləşmiş Ərəb Əmirliklərində keçiriləcək dünya çempionatında iştirakı ilə bağlı jurnalistlərə açıqlamasında deyib.

O, komandaya inandıqlarını bildirib: “Çempionluğa namizədlərdən hesab edilirik. Bunu doğrultmağa çalışacağıq. Komandamıza inanırıq”.

O.Hüseynov bildirib ki, heyətin bütün üzvləri mundiala hazırdır: “Antalyadakı təlim-məşq toplanışının ikinci həftəsində mən özüm də iştirak etdim. Baş məşqçi üçün yekun heyəti müəyyənləşdirmək çox çətin idi. Çünki komandanın bütün üzvləri turnirə hazır idilər. İkitərəfli oyunlarda, məşqlərdə futbolçuların əzmli olmaları, mübarizliyi diqqətdən yayınmırdı. Hərdən emosiyalara da qapılırdılar və məşqdə olduqlarını unudurdular. Eyni mübarizə əzmi ilə dünya çempionatının bütün oyunlarında çıxış edəcəklərinə inanıram. Ümid edirəm ki, vətənə çempion kimi qayıdacağıq”.

İbrahim CƏFƏROV