II Liqa klubuna texniki məğlubiyyət veriləcək - EKSKLÜZİV

Bu gün II Liqanın 8-ci turu çərçivəsində keçirilən “Dinamo” - “Kür Araz” oyununun nəticəsi (2:3) ləğv olunacaq.

Futbolxeber.az saytının matçı izləyən əməkdaşının verdiyi məlumata görə, qonaqların heyətində ikinci hissədə adı matçın protokolunda olmayan oyunçu daxil olub. Söhbət “Kür Araz”ın 18 nömrəli hücumçusu Ceyhun Quliyevdən gedir. Onun adı matçın protokoluna daxil edilməsə də, 32 yaşlı forvard ikinci yarıda meydana çıxıb.

Fotodan da göründüyü kimi, Ceyhun Quliyevin adı "Dinamo" ilə matçın protokolunda yoxdur. Bu səbəbdən də AFFA İntizam Komitəsi matçın nəticəsini ləğv edərək, “Kür Araz”a texniki məğlubiyyət verəcək. Eləcə də İmişli klubu 400 manat cərimə olunacaq.

Xatırladaq ki, bu, cari mövsümdə üçüncü belə haldır. II turda "Baku Sportinq" "Cəbrayıl"la görüşdə, IV turda isə "Cəbrayıl" "Şahdağ Qusar"la matçda adı protokolda olmayan futbolçunun xidmətindən istifadə etdiyi üçün AFFA İntizam Komitəsi tərəfindən hər iki kluba texniki məğlubiyyət verilib.

Fərəc ASLANOV