Siyasət Əsgərov: "Oyundan razı qaldığımı deyə bilmərəm"

Azərbaycanın qadın futbolçulardan ibarət yığmasının baş məşqçisi Siyasət Əsgərov Millətlər Liqası çərçivəsində bu gün “Dalğa Arena”da Kiprə qarşı keçirdikləri matç (1:1) haqqında fikirlərini bölüşüb.

Futbolxeber.az-ın AFFA-nın saytına istinadən verdiyi məlumata görə, o, oyunun çətin keçdiyini deyib:

“İlk oyun həmişə çətin olur. Futbolçularda həyəcan var idi. Məqsədimiz qələbə qazanmaq idi. Yaratdığımız imkanlardan istifadə edə bilmədik. Rəqib də bizim bir səhvimizdan maksimum istifadə edib qol vurdu. Oyundan razı qaldığımı deyə bilmərəm. Növbəti oyunu səfərdə Monteneqro yığmasına qarşı keçirəcəyik. Bu görüşü analiz edib buraxdığımız səhvləri aradan qaldırmağa çalışacağıq. Psixoloji cəhətdən də yaxşı hazırlaşmalıyıq. Monteneqro tam fərqli bir komandadır, keyfiyyətli oyunçuları var. Məqsədimiz səfərdən xalla qayıtmaqdır”.