Musa Qurbanlı İsveçdəki həyatından danışdı: “Xəyallarımın ardınca gedirəm” (MÜSAHİBƏ)

“Yurqarden”in hücumçusu Musa Qurbanlının müsahibəsi

- “Yurqorden”də özünü necə hiss edirsən? Artıq ölkə kuboku və çempionat oyununda fərqləndiyindən yeni komandana uyğunlaşdığını düşünmək olar?

- Hər şey qaydasında, yeni komandamla bağlı fikirlər müsbətdi. İlk gündən mənə qarşı ancaq isti münasibət gördüm. Azarkeşlər də məni çox yaxşı qarşıladılar ki, bu da məni sevindirir. Bütün bu amillər komandaya uyğunlaşmaqda çox kömək oldu. Hələ ki, hər şey yaxşı gedir. Düzdür, ilk vaxtlar bəzi məğlubiyyətlərimiz oldu. Amma hazırda komanda yaxşı formadadı və qələbələri sıralamağa başlamışıq.

- “Yurqorden”nin əsas məqsədi nədi, hansı hədəf uğrunda mübarizə aparır?

- Çempionatda maksimum yüksək yer tutmaq uğrunda mübarizə aparırıq. Komanda hazırda 4-cü pillədə qərarlaşıb. “Yurqorden” böyük klubdu və daim çempionluğa oynayıb. İlk pillədə qərarlaşan komanda ilə aramızda 8 xal fərqi var. Fikrimcə, bu o qədər də böyük fərq sayılmamalıdı. Çalışacağıq bacardıqca irəli gedək. Yenə təkrarlayıram, “Yurqorden” daim çempionluğa oynayıb. Bilirsiz ki, komanda ötən il Konfrans Liqasının qrupunda oynayıb və 1-ci pilləni tutub.

- Legioner həyatı yaşayan azərbaycanlı futbolçularda sanki vətən üçün darıxmaq “sindrom”u var. Sən necə, soyuq İsveçdə günəşli Azərbaycan üçün darıxmırsan?

- Açığı, soyuq və ya isti mənə fərq etmir. Düzdür, hələ ki, soyuğu görməmişəm. Orda da havalar hələ o qədər də soyumayıb. Darıxmağa gəlincə, məncə, bu, normal hissdi. Ailən, dostların, yaxınların səndən uzaqdadı. Ona görə, darıxmaq varsa, bunu normal qarşılamaq lazımdı. Nə qədər telefonla danışsan da, əlaqə saxlasan da, ailənin, dostların yanında olmaq tam fərqlidi. Düşünmürəm ki, bu duyğu ancaq azərbaycanlı futbolçulara aiddi. Legioner həyatı yaşayan bütün futbolçular bu hissi keçirir.

- Uzaq İsveçdə ən çox kim və nə üçün darıxırsan?

- Təbii ki, ailə üzlərim və yaxın dostlarım üçün. Onlarla bir yerdə olmağa alışmışam. Evə gələndə əzizlərimi evdə görməyə adət etmişəm. İstərdim ki, yanımda olsunlar. Amma bilirəm ki, bu, mənim işimin bir parçasıdı və buna peşəkar yanaşmağa çalışıram. Bilirəm ki, işimi görürəm, xəyallarımın ardınca gedirəm. Məqsədə çatmaq üçün bəzən nəyisə qurban verməli olursan. Mən də buna hazıram. Darıxsam da, bunun öhdəsindən gəlməyə çalışıram.

- “Qarabağ”ın Avropa Liqasının qrupunda rəqiblərindən biri də İsveç çempionatında çıxış edən “Hekken”di. Qurban müəllimlə bu klub barədə söhbətiniz olub, ona hansısa məlumat vermisən?

- Əlaqə saxlamışıq, bu barədə danışmışıq. Açığı, özümün də “Hekken” barədə çox məlumatım olmadığından Qurban müəllimə ətraflı, dolğun nəsə deməmişəm. “Yurqorden”ə transfer olunandan “Hekken”ə qarşı oynamamışıq. Hər halda ötən mövsümün çempionudular. İsveç çempionu isə zəif ola bilməz. Püşkdən sonra qrupdakı rəqiblərdən biri “Hekken” olunca Qurban müəllimlə dərhal danışdıq. Ona “sizi burda gözləyirəm” söylədim (gülür).

Mənbə: Sport24.az