“Hakimləri təhqir etməmişəm”

“Mən hakimləri təhqir etməmişəm, yaxud ünvanlarına hər hansı nalayiq ifadə işlətməmişəm. Sadəcə olaraq oyundan sonra dedim ki, baş məşqçiyə qarşı hakimlərin davranışı doğru deyildi. Mənə dərhal qırmızı vərəqə verildi”.

Futbolxeber.az saytına müsahibəsində bu sözləri Əvəzedicilər liqasının V turunda “Neftçi-2” ilə oyundan sonra hakimin qərarına etiraz etdiyinə görə birbaşa qırmızı vərəqə alan “Sumqayıt-2”nin baş məşqçisi Vaqif Cavadov deyib.

Həmin qırmızı vərəqəyə görə AFFA İntizam Komitəsi Cavadovu 2 oyunluq cəzalandırıb, “Sumqayıt” isə 150 manat cərimə edilib.

Veteran futbolçu qeyd edib ki, hakimlər baş məşqçiləri dinləməlidirlər: “Qərar onlarındır, amma inanıram ki, yenidən bu hal təkrarlanmayacaq. Hakimlər bilməlidirlər ki, baş məşqçilərin düzgün formada etiraz etmək hüququ var. Məşqçiləri dinləmək, fikirlərinə hörmətlə yanaşmaq lazımdır”.

Əvəzedicilər liqasında 5 turdan sonra "Sumqayıt-2" 6 xalla səkkizinci pillədə qərarlaşıb. Vaqif Cavadov komandasının zamanla daha yaxşı çıxış edəcəyini bildirib: “Komandamın çıxışından razıyam. Gənc kollektivimiz var. Bundan sonra daha yaxşı nəticələr əldə edəcəyik. Sadəcə çalışmaq lazımdır. Komandanın inkişaf etdirmək üçün əlimizdən gələni edirik. Belə davam etsək, yaxşı nəticələr əldə edəcəyik”.

Azad NURİYEV