Süleymanov təyinatından danışdı

"Neftçi" bu gün yeni baş məşqçisi Nazim Süleymanovu ictimaiyyətə təqdim edib. Futbolxeber.az-ın məlumatına görə, təqdimetmə mərasimində jurnalistlərin suallarını cavablandıran Nazim Süleymanov komandasının qarşısında duran hədəflərdən də söz açıb: “Neftçi” ilə dünən müqavilə bağladım. Klubun prezidenti Sadıq Sadıqova dərin təşəkkürümü bildirirəm ki, seçimi mənim üzərimdə etdi. 3 il ardıcıl çempion olmuş və Avroliqada oynamış bir klubda işləmək böyük məsuliyyət tələb edir. Mən də çalışacam ki, məqsədlərimizə çatmaq üçün əlimizdən gələni edək. Hədəfimiz “Neftçi”nin çempionluğunu təkrarlamaq və yenidən minimum Avroliqanın qrupuna düşməkdir”. N.Süleymanov köməkçiləri haqda dolğun məlumat verə bilməyib: "Əvvəlki 3 məşqçi istefa verib. Onlara uğurlar arzulayıram. Qapıçı və fiziki məşqçinin kimliyi hələ açıq qalır. Fasilə zamanı bu məsələyə aydınlıq gətirəcəyik”.