“Klub rəhbərliyi Elmar Baxşıyevə güvənir”

“Elmar Baxşıyevin istefaya göndərilməsi məsələsi gündəmdə deyil. İnanırıq ki, onun rəhbərliyi altında komanda “qara zolaq”dan çıxmağı bacaracaq”.

Futbolxeber.az saytının məlumatına görə, bu sözləri Sport24.az-a açıqlamasında “Qəbələ”nin baş meneceri Nail Kərimov bildirib.

Cari mövsümün startı “qırmızı-qaralar” üçün uğursuz başlayıb. Komanda 4 turdan sonra xalsızdı və turnir cədvəlinin sonuncu pilləsində qərarlaşıb. Bu üzdən çoxları Baxşıyevin kreslosunun laxladığını, “Qəbələ”nin Premyer Liqanın 5-ci turunda “Zirə”yə də uduzacağı halda rəhbərliyin onu yola salacağını düşünür. Ancaq klubun baş meneceri açıqlamasında bu fikirləri yaxın buraxmayıb və 43 yaşlı mütəxəssisə güvəndiklərini bildirib: “Son günlər baş məşqçimizlə bağlı müxtəlif fikirlər səslənir. Ancaq klub rəhbərliyi ona güvənir. Mövsümlərarası fasilədə komanda da baş verən dəyişiklər hamıya məlumdu. Yeni kollektiv qurmaq, qısa vaxtda nəticə qazanmaq düşünüldüyü kimi asan məsələ deyil. İnanırıq ki, qarşıdakı oyunlarda oyunumuzu tapıb, azarkeşlərimizi sevindirə biləcəyik”.

Nail bəy qarşıdakı günlərdə yeni transferin də olacağını istisna etmədi: “Vinger mövqeyinə futbolçu axtarırıq. Yaxşı, bizim şərtlərimizi qəbul edən legioner olsa, anlaşacağıq. Ancaq bu o demək deyil ki, mütləq yeni futbolçu transfer olunacaq. Bizi qane edəcək oyunçu olmasa, transfer xatirinə transfer etmək fikrimiz yoxdu, yolumuza bu heyətlə davam edəcəyik”.