“Səbail”in “səyyah”ı: “...azərbaycanlılar futbolu sevmirlər” (MÜSAHİBƏ)

“Səbail”in müdafiəçisi Adi Mehremiç Futbolxeber.az saytına müsahibə verib.

“TOVUZDA HƏM DƏ ŞƏHRİYAR RƏHİMOV ÜÇÜN MÜBARİZƏ APARIRDIQ”

- Dördüncü turda “Səbail” qələbə həsrətinə son qoydu. “Turan Tovuz” üzərində qələbəni necə şərh edərdiz?

- Səfərə qələbə üçün yollanmışdıq. Matçın startı da göstərdi ki, 3 xal qazanmağımız mümkündü. Oyuna yaxşı başladıq, erkən qol vurmağa müvəffəq olduq. Çətin oyun olsa da, xarakter nümayiş etdirdik və qalib gəldik. Həm də Şəhriyar Rəhimov üçün mübarizə aparardıq. Allah rəhmət eləsin. Şəxsi tanışlığım olmasa da, komandada onu tanıyan hər kəs haqqında yalnız müsbət fikirlər səsləndirir.

- İlk 3 turla müqayisədə “Səbail”də nə dəyişdi ki, komanda uğursuzluq zolağından çıxa bildi?

- Əslində, biz ilk 3 turda da pis oynamamışdıq. Sadəcə fərdi səhvlər qələbə qazanmağımıza imkan vermirdi. Budəfəki görüşə həftə boyu çox ciddi hazırlaşdıq. “Turan Tovuz”a qarşı kompakt, diqqətli çıxış etdik. Az səhvlərə yol verdik ki, bu da yekunda qalib gəlməyimizə səbəb oldu.

- Bu qələbənin ardını gətirmək mümkün olacaq?

- Bizim üçün bir qələbə çox vacib idi ki, klubdakı atmosfer qaydasına düşsün. Çünki ardıcıl uğursuz oyunlardan sonra istər-istəməz gərginlik yaranır. Çalışacağıq ki, növbəti oyunlarda da heç nədən xal itirməyək. Əgər səhvlərə yol verməsək, işimizə ciddi yanaşsaq, qələbələr gələcək.

“QARABAĞ” AZƏRBAYCANIN ƏN GÜCLÜSÜDÜR"

- Lakin unutmayaq ki, növbəti oyununuz “Qarabağ”ladı...

- Bəli, “Qarabağ”a qarşı oynayacağıq. Bilirəm ki, “Qarabağ” Azərbaycanın ən güclü klubudu. Hazırda UEFA Avropa Liqasında mübarizə aparırlar. Həftə arası da oyunları var. Buna görə də ola bilər ki, bizimlə matça əsas heyətlə çıxmasınlar. Bu da bizim üçün üstünlük olacaq.

- “Səbail”in heyətində yenisiz. Artıq komandaya tam uyğunlaşdığınızı söyləmək olar?

- Bəli, artıq komandaya tam adaptasiya olmuşam. Burada çoxları rus dilini bilir. Həm də Azərbaycan mənim çıxış etdiyim 11-ci ölkədi (gülür). Bu səbəbdən də uyğunlaşma ilə bağlı ciddi problem yaşamıram. Düzdür, bəzən elə ölkələr olur ki, adama uyğunlaşmaq çətinliklə üzləşir. Lakin mən ilk gündən burada özümü yaxşı hiss edirəm. Komandada hər kəs məni yaxşı qarşıladı.

- Maraqlıdır, rus dilini harada öyrənmisiz?

- Ukraynada çıxış edərkən. 2018/19 mövsümün “Karpatı”da keçirmişəm. Rus dilini də həmin vaxt öyrənmişdim.  

“FUTBOL AĞIR BİZNESDİR” 

- Özünüz də qeyd etdiz ki, Azərbaycan çıxış etdiyiniz 11-ci ölkədi. Buna qədər Slovakiya, Latviya, Çexiya, Avstriya, Ukrayna, Portuqaliya, Polşa, İsrail, Türkiyədə legioner həyatı yaşamısız. Tez-tez klub dəyişməyinizə səbəb nədir?

- Futbol ağır biznesdir. Hər zaman işlər sən istəyən kimi getmir. Hansısa klubda məşqçi dəyişir, yaxud rəhbərlikdə əvəzləmə olur. Yeni məşqçi gələndə adətən öz tanıdığı futolçuları heyətə qatır. Mən isə heç vaxt ikinci olmağı xoşlamıram. Eləcə də ürəyimcə olmayan atmosferdə qala bilmirəm. Hər zaman özümü müxtəlif ölkələrdə sınamaq isətmişəm. Mənə belə rahatdı.

- Son olaraq “İstanbulspor”da forma geymisiz. Məlum məsələdir ki, Türkiyə Superliqası ilə Azərbaycan Premyer Liqasını tərəzinin eyni gözünə qoymaq olmaz. İki çempionat arasında əsas fərqlər hansılardır?

- Türkiyə Superliqası dünyada ən güclü çempionatlardan biridir. Yaxşı futbolçular var, istər yerli, istər legionerlər. Maliyyə dayaqları çox güclüdür. Stadonların vəziyyəti əladır, atmosfer çox yaxşıdır. Türkiyə böyük, əzəmətli dövlətdir. Ayyarımdı burdayam. Deyə bilərəm ki, Azərbaycan çempionatı da heç də zəif deyil. Burada da yaxşı futbolçular var. Azərbaycan klubları avrokuboklarda uğurla çıxış edir. Bilirəm ki, “Qarabağ” mütəmadi olaraq avrokubokların qrup mərhələsində mübarizə aparır. Cari mövsüm “Neftçi” və “Sabah” da pis təsir bağışlamadılar.

- Lakin avrokuboklarla müqayisədə çempionat oyunlarına azarkeş gəlmir...

- Belə görünür, azərbaycanlılar futbolu çox sevmirlər (gülür). Nə etmək olar? Azsaylı azarkeşlərimiz olsa da, onları sevindirməyə çalşırıq. Ümid edək ki, stadionlarda gələcəkdə daha çox azarkeş görəcəyik.

“NEFTÇİ” SƏFƏRDƏ O QOLU VURMASAYDI...”

- Avrokuboklardan söz düşmüşkən, sabiq klubun “Jelezniçar”ın “Neftçi” ilə Bakıdakı oyununu stadiondan izlədiz?

- Bəli, stadiondaydım. Maraqlı görüş idi. Düşünürəm ki, “Neftçi” layiqli qələbə qazandı. Məncə, səfər oyunun son dəqiqələrində vurulan qol “Neftçi”nin mərhələ adlamasında həlledici rol oynadı. Səfərdə həmin qolu vurmasaydılar, “Jelezniçar” 2:1 hesablı qələbə qazansaydı, burada müdafiəyə daha çox diqqət ayıracaqdılar və biz tam başqa cür gedişat izləyə bilərdik.

- Söhbətimizə “Səbail”lə başladıq, elə hazırkı klubunuzla da bitirək. Komanda bu mövsüm nəyə ümid edə bilər?

- Məncə, “Turan Tovuz”la görüşdə olduğu kimi oynasaq, rahat şəkildə ilk “altılığ”a düşə bilərik. Sadəcə hər matçda mübarizə aparmaq, oyundan-oyuna artırmaq lazımdı.

- Lakin nəzərə alaq ki, ilk “altılıq” heç nə vermir. Avrokuboklar üçün “altılığ”a yox, ilk “dördlüy”ə düşmək lazımdı...

- Elədi, ancaq indidən nəsə demək olmaz. Hər şey mövsümün gedişində məlum olacaq. Çempionat yenicə start götürüb. Bizi qarşıda uzun marafon gözləyir.

İbrahim CƏFƏROV