Pit: "Desələr oyna, oynayacağam" (Müsahibə)

Bir müddət əvvəl Con Toşakın qərarına əsasən "Xəzər Lənkəran"dan uzaqlaşdırılan, bu gündən etibarən əvəzedici heyətin məşqlərinə qoşulan Adrian Pit Futbolxeber.az saytına müsahibə verib.

- Bu gündən "Xəzər Lənkəran"ın əvəzedici heyətində məşqlərə başlamısan. Bu haqda nə deyə bilərsən?
- Hər şey normaldı. Bu gün komanda ilə ilk məşqə çıxdım. Özümü yaxşı hiss edirəm.

- Komandaya qayıdışın necə baş tutdu?
- Ofisdən mənimlə əlaqə saxladılar və bildirdilər ki, əvəzedici heyətdə məşq edə bilərəm. Mən də razılaşdım.

- Əsas heyətə qayıtmaq şansın var?
- Bu haqda heç nə deyə bilmərəm. Çünki tək mənim qəbul edə biləcəyim qərar deyil.

- Komandanın baş məşqçisi Con Toşakla görüşmüsən?
- Yox.

- Düşünmürsən ki, Toşakla danışsan, bəlkə də səni yenidən heyətə qaytarar?
- Bu, mənim işim deyil.

- Bəs, əvəzedici heyətdə ancaq məşq edəcəksən, yoxsa oyunlara da çıxacaqsan?
- Bu haqda onlar qərar qəbul edəcəklər, mən yox. Desələr oyna, oynayacağam.

- Xeyli müddətdir futboldan kənarda qalmısan. Komandayla məşqə çıxdıqdan sonra özünü necə hiss edirsən?
- Həqiqətən də 3 ay futboldan kənarda qaldım. Belə vəziyyətdə formamı qorumağım qeyri-mümkün idi. Hər nə qədər fərdi qaydada məşq etsəm də, alınmırdı. İndi bir qədər vaxta ehtiyacım var. Qısa zamanda əvvəlki formamı bərpa edib, 100 faiz hazır olacağam.

- Əvəzedici heyətdə qalmağı nə qədər düşünürsən?
- Bu suala cavab verə bilmərəm. Çünki məndən asılı olan məsələ deyil.

- Yanvara kimi vəziyyət dəyişməsə, komandanı tərk edəcəksən?
- Bu sualı mənə yox, Tuyqun Nadirova verin.

- Məgər, sənə təklif gəldi, Tuyqun Nadirov getməyinə icazə vermədi?
- İndi dəqiq bir söz deyə bilmərəm. Zaman özü hər şeyi göstərəcək.