"Kəpəz"in İdarə Heyətinin sədri: “Neftçi” ilə oyunun nəticəsi gözlənilməz oldu”

"Kəpəz"in İdarə Heyətinin sədri İlqar Nadirinin Futbolxeber.az saytına müsahibəsi

- Mövsümün ilk matçı - “Neftçi” ilə qarşılaşma haqda fikirlərinizi bilmək istərdik.

- Bildiyiniz kimi, "Neftçi" ilə matç tarixi derbidir. İki köklü komandanın mübarizəsidir. Matçın Gəncədə keçirilməsi komandanın vəziyyətindən asılı olmayaraq oyuna marağı daha da artırır. Komandamızın bu oyunda döyüşəcəyini əvvəlcədən bilirdik. Çempionatın ilk matçlarında gözlənilməz nəticələr olur. "Kəpəz" bu gün meydanda sonacan döyüşdü, mübarizə apardı. Qol vurmaq üçün xeyli imkanlarımız oldu. Növbəti oyunlarda da belə performans gözləyirik.

- İkinci hissədə "Kəpəz"in xeyli qol imkanları oldu...

- Əsas olan o qol imkanların yaratmaqdır. Komanda üçün sevindirici haldır ki, daim hücumda oynayır, irəli atılır. Bunlar bizi sevindirir. Bu, futboldur, bəzən şanslar alınmaya bilər. Qarşıdakı oyunlarda bunları aradan qaldırmağa çalışacağıq.

- Nəticə sizin üçün gözlənilməz olmadı?

- Gizlətməyə ehtiyac yoxdur. Nəticə gözlənilməz oldu. Bununla belə, Gəncədə istənilən rəqiblə axıra qədər mübarizə aparmağa hazırıq. Xatırlayırsınızsa, ötən mövsüm ev oyunlardan yalnız "Neftçi" və "Sumqayıt"a məğlub olduq. Qalan heç bir komandaya uduzmadıq. İstənilən rəqib üçün Gəncədə oynamaq çətindir. Biz də istəyirik ki, bütün oyunlarımız Gəncədə olsun.

- "Kəpəz"in sponsorluqla bağlı məsələsi hələ də gündəmdədir. Hətta bu mövzuda İqtisadiyyat Nazirliyinin rəsmisinin adı da çəkilir...

- Biz də sponsorun olmasını istəyirik. Komanda üçün bu, acınacaqlı vəziyyətdir. Ölkənin ikinci ən böyük şəhərinin, belə azarkeşləri olan bir klubun sponsorunun, maliyyə dəstəyinin olmaması yaxşı bir hal deyil.

- Texniki zonadan bir xəstəxana adı gördük. Onlarla əməkdaşlıq nə yerdədir?

- Biz onlarla yeni əməkdaşlığa başlamışıq. Onlar komandamızın tibbi xərclərini öz üzərinə götürüblər. Bu, bizim komandamız üçün bir addımdır. Bu baxımdan onlara təşəkkürümü bildirirəm.

- Akademiya ilə bağlı məsələ nə yerdədir?

- Bu yaxınlarda akademiyaya yeni rəhbər təyin olundu. Hazırda mebel və texniki təchizat üzrə işlər davam edir. Tender üzrə qalib olan şirkət tərəfindən ödəniş olunub. İnanırıq ki, bu ay və ya gələn ayın sonuna kimi akademiyanın açılışı gözlənilir.

- Bu tarixi derbidə qələbə sponsorun komandaya cəlb olunmasına təsir göstərə bilər?

- Təki belə olsun. Təki qələbə qazanaq və "Kəpəz"ə maraq göstərən iş adamlarının sayı birə-beş artsın.

- Komandanın qarşısına hansı məqsəd qoymusunuz?

- Bu gün rəhbər olaraq əsas məqsəd komandanı formalaşdırmaq, onu döyüşkən ruh vermək və Premyer Liqada yerini saxlamaqdır.

- Gəncə III MDB oyunlarına ev sahibliyi edəcək. Düşünmək olar ki, bundan sonra “Kəpəz”in stadion məsələsi həll olunacaq?

- Mən də bunu mətbuatda oxumuşdum. İstəyirəm ki, həmin tədbir gözəl bir stadionda keçirilsin və bu münasibətlə Gəncədə gözəl bir arena tikilsin.