“Qarabağ” dünən ustalığı hesabına qələbə qazandı” - AÇIQLAMA

“Qarabağ”ın dünənki oyunda çətinliklə üzləşəcəyi gözlənilən idi. Mövsümün ilk rəsmi oyunu olduğunu unutmamalıyıq. Onu da nəzərə almaq lazımdır ki, “Qarabağ” əvvəlki illərdə də Çempionlar Liqasının ilk mərhələsində müəyyən çətinliklə üzləşir”.

Futbolxeber.az saytına açıqlamasında bu sözləri milli komandamızın məşqçisi Arif Əsədov “Qarabağ”ın dünən Çempionlar Liqasının ilk mərhələsində Cəbəllütariqdə “Linkoln”a qarşı keçirdiyi oyunu (2:1) şərh edərkən deyib.

Təcrübəli mütəxəssis qeyd edib ki, “Qarabağ” dünən qalib gəlməsəydi belə, yenə də mərhələni adlayacaq gücdədi: “İlk oyunların çətin keçməsi səbəbsiz deyil. Heyətdə müəyyən dəyişikliklər olur. Gedənləri yeni transferlər əvəzləyir ki, onların komandaya adaptasiya olunması, oyun üslubunun təkmilləşdirilməsi müəyyən qədər vaxt aparır. Dünənki matçda meydan amili və hava şəraiti də “Qarabağ”ın əleyhinə idi. İsti havada, özü də süni qazonda oynamaq heç də asan deyil. Televizordan belə görünürdü ki, sanki meydançanın ölçüləri də standart deyil. Bütün bunlara baxmayaraq, “Qarabağ” dünən ustalığı hesabına qələbə qazandı. Əvvəldən də çempionumuzun favorit olduğunu hamımız bilirdik. Dünən hətta heç-heçə etsəydi, yaxud uduzaydı belə, “Qarabağ” Bakıdakı oyunda bu rəqibi məğlub etməklə mərhələni adlamağa qadirdi”.

İBRAHİM