Juninyo “Linkoln”la oyuna saatlar qalmış: “Rəqibin kimliyindən asılı olmayaraq...”

Bu yay “Qarabağ”ın “rənglərinə bağladığı” yeni futbolçulardan Juninyo Çempionlar Liqasının birinci təsnifat mərhələsinin ilk oyunu çərçivəsində bu gün keçiriləcək “Linkoln”la oyun ərəfəsində Sport24.az-a müsahibə verib.

Futbolxeber.az saytı həmin müsahibəni təqdim edir:

- Öncə “Qarabağ”ın Avstriya və İspaniyada keçirilən təlim-məşq toplanışını dəyərləndirməni istərdik.

- Bilirəm ki, hazırlığın ilk mərhələsi Bakıda olub. Təəssüf ki, həmin vaxt düşərgədə deyildim. “Qarabağ”a Avstriyada qoşulmuşam. Düşərgəyə bir az gec gəldiyimdən bir müddət fərdi məşq etməli oldum. Son məşqlərdə artıq tam olmasa da, komanda ilə birgə çalışıram. Avstriya toplanışında komanda üçün hər cür şərait yaradılmışdı. Futbolçuların əhval-ruhiyyəsi, məşqlərə yanaşması yüksək səviyyədə idi. Ümid edirəm qarşıdakı rəsmi oyunlarda gərgin məşqlərin bəhrəsini görəcəyik.

- Yeni komandan barədə fikilərin maraqlıdı...

- “Qarabağ”a gəlməmişdən əvvəl klub barədə az-çox məlumatım var idi. Kadi və Julio Romao ilə əvvəldən tanışam. Onlar bura gələndən sonra imkan daxilində “Qarabağ”ı izləyirdim və müsbət rəylər eşidirdim. Seçimimi edəndən sonra bir daha yanlış qərar vermədiyimi başa düşdüm. Düşərgədə mənimlə eyni dildə danışanların olması kollektivə uyğunlaşmağımı bir qədər də sürətləndirir. Kollektivimizdə tək onlar yox, digərləri də - istər texniki işçilər, istər məşqçilər korpusu, istərsə də futbolçular mənə isti münasibət göstərir. Açığı, yeni olsam da, özümü heç də yad kimi hiss etmirəm. Hər şey qaydasındadı.

- “Linkoln”la bu gün keçiriləcək oyunla bağlı nə düşünürsən?

- Nəzərə alaq ki, mövsümün ilk rəsmi oyunudu. Rəqibin kimliyindən asılı olmayaraq, ilk oyunlar həmişə həyacanlı və çətin olur. Nə qədər hazırlıqlı olursan ol, birinci oyun olduğu üçün bəzi çatışmazlıqlar üzə çıxır. Ümid edirəm və inanıram ki, mümkün qədər az texniki səhvə yol verəcəyik və Bakıya istədiyimiz nəticə ilə dönəcəyik.