“Azərbaycan futbolunda Zaur Axundov kimi ürəkli adam yoxdu”

“AZAL-da 3 il ərzində işlədim. İlk vaxtlar çalışırdıq ki, komanda yüksək yerlər uğrunda mübarizə aparsın. Lakin son mövsümdə komandanın büdcəsi çox aşağı idi və bilinirdi ki, növbəti illərdə AZAL mövcud olmayacaq”.

Futbolxeber.az saytının məlumatına görə, bu sözləri “Kəpəz”in baş məşqçisi Tərlan Əhmədov daim aşağı büdcəli komandalarda çalışması barədə sualı cavablandırarkən deyib.

O, “Neftçi”də işlədiyi müddətdə rəhbərlik tərəfindən haqsızlıqla üzləşdiyini bildirib:

“AZAL-dan sonra “Neftçi”yə gəldim. Mən komandanı qəbul edəndə 5 turdan sonra cəmi 1 xal var idi. Lakin heyəti formalaşdırdıq. Rəhbərlik 4-5-ci yerləri istəmişdi. Mənə deyilmişdi ki, komanda son mövsümü 7-ci pillədə bitirib. Bu dəfə 4-5-6-cı yerlərdən birini tutmaq və “Neftçi” adına futbol oynamaq lazımdı. Amma yekunda biz mükafatçılar sırasına düşdük, mövsümü üçüncü pillədə başa vurduq. Nədənsə sonradan rəhbərlik yeni mövsümdə məni komandada görmək istəmədi. Mən heç vaxt işə görə inadkarlıq göstərmirəm. Əgər istənilmirəmsə, deməli, o yerdə qalmağa dəyməz”.

Təcrübəli mütəxəssis “Keşlə”də çalışdığı müddəti də xatırlayıb. T.Əhmədov həmin dönəm paytaxt klubuna rəhbərlik edən AFFA İcraiyyə Komitəsinin üzvü, Azərbaycan Futzal Federasiyasının prezidenti Zaur Axundov barədə müsbət fikirlər səsləndirib:

“Neftçi”dən sonrakı iş yerim “Keşlə” (indiki “Şamaxı” - red.) oldu. Əvvəl də demişəm, yenə deyirəm, hər zaman da deyəcəm - Zaur Axundov kimi Azərbaycan futbolunda ürəkli insan yoxdu. Tam fərqli biridi. O qədər gözəl ürəyi var ki... Sadəcə bəzi insanlar onun ürəyindən başqa cür istifadə etməyə çalışırlar. “Keşlə”də ilk ildə sonuncu yeri tutsaq da, növbəti mövsüm üçün şans verildi. Heyətdə köklü dəyişiklik etdik. 18 futbolçu ilə vidalaşdıq, əvəzində 16 yeni oyunçu dəvət etdik, yeni komanda formalaşdırdıq. Mövsümün sonunda da üçüncü yeri tutmaqla avrokuboklara vəsiqə qazandıq”.