"Lex"in futbolçusu "Qarabağ"la oyunu xatırladı: "Pis gün idi"

"Lex"in (Polşa) futbolçusu Pedro Reboşu bu mövsüm Çempionlar Liqasının 1-ci təsnifat mərhələsində "Qarabağ"a qarşı keçirdikləri oyunları (1:0, 1:5) xatırlayıb.

Futbolxeber.az saytının məlumatına görə, o, Ağdam klubuna Bakıda 1:5 hesabı ilə uduzduqları matçın onlar üçün pis gün olduğunu bildirib:

“Qarabağ”la ilk oyundan sonra hiss etdik ki, bu səviyyədə mübarizə aparmaq üçün hər şeyimiz var. Cavab oyunundan sonra da məyusluğa baxmayaraq, Avropada gözəl macəra yaşaya biləcəyimizi başa düşdük. Pis gün idi, amma o zaman düşündük ki, Avropada inkişafa doğru gedə bilərik. Tezliklə qalib gəlməyə də başladıq. Bundan sonra gələcək uğurlara tam inamımız oldu. Onsuz da qrup mərhələsində və ya pley-off mərhələsində çətin olacaqdı. Amma xüsusən evdə "Qarabağ"ın  öhdəsindən gələ bildik".

Qeyd edək ki, "Lex" ÇL-in 1-ci təsnifat mərhələsində evdə Ağdam təmsilçisinə 1:0 hesabı ilə qalib gəlsə də, Bakıda 1:5 hesabı ilə uduzaraq turnirdə mübarizəni dayandırıb. Komanda daha sonra Konfrans Liqasının 1/4 finalına qədər irəliləyib və burada hazırda turnirin finalçısı olan "Fiorentina" səddini keçə bilməyərək çıxışını başa vurub.