Şahin Diniyev: “Xəyallarla yaşamağa dəyməz”

“Hər birinizi salamlayıram, axşamınız xeyir. Amma bizim üçün bu əhval-ruhiyyə ilə axşam yəqin ki, xeyirli olmayacaq”.

Futbolxeber.az saytının məlumatına görə, bunu “Səbail”in baş məşqçisi Şahin Diniyev Azərbaycan Premyer Liqasının XXVIII turunda “Kəpəz”ə 0:1 hesabı ilə uduzduqları oyundan sonra deyib.

Təcrübəli mütəxəssis komandasının qol şanslarını qaçırdığını bildirib: “Həyat davam edir, bu futboldur. Futbolda da 3 nəticədən biri olmalıdır. Qələbə münasibəti ilə “Kəpəz”i təbrik edirəm. Bu cür oyunların taleyini adətən 1 qol həll edir. Oyunun gedişatı da onu göstərirdi. Təəssüf ki, ikinci hissədə futbolçularımız dayandılar. Halbuki fasilədən sonra ardıcıl 3 qol epizodumuz var idi. Onlardan istifadə etsəydik, yəqin ki nəticə fərqli olacaqdı”.

Diniyev Premyer Liqada qalmaq uğrunda mübarizədə “Sumqayıt” və “Kəpəz”dən geri düşdüklərini bildirib: “Hesabda geri düşdükdən sonra dəyişikliklər edib, hücum xəttini gücləndirsək də, nəticəni dəyişmək mümkün olmadı. İrəli baxmalıyıq. Düzdür, “Sumqayıt” və “Kəpəz” bu tur qələbə qazanmaqla bizdən aralandılar və bu, onlar üçün böyük sıçrayışdır. “Şamaxı” ilə vuruşmalıyıq. Lakin digər tərəfdən də sona 8 tur qalıb və hər an hər şey dəyişə bilər. Ümidliyəm, təslim olmayacağıq, sona kimi mübarizə aparacağıq. Bugünkü oyunu çıxmaq şərti ilə, sərgilədiyimiz futbola görə, şəraitinə görə “Səbail” Premyer Liqada qalmağa layiqdir”.

“Səbail”in çalışdırıcısı psixoloji baxımdan çətinlik yaşadıqlarını qeyd edib: “Açığını deyim ki, psixoloji hazırlığa daha çox vaxt ayırmaq məcburiyyətində qalırıq. Komandamız təzyiq altındadır. Hər bir futbolçu uduzmağa, səhv buraxmağa qorxur. Hazırda ən böyük problemimiz məhz psixoloji amillə bağlıdır. Aldığımız qırmızı vərəqələr, qapımıza təyin edilən penaltilər də bundan irəli gəlir”.

O, futbolçuların ustalıq səviyyəsində müəyyən çatışmazlıqların olduğunu söyləyib: “İndiki məqamda futbolçularımın oyunçu keyfiyyəti barədə pis nəsə deməyim düz çıxmaz. Ola bilər, ustalıq səviyyəsi baxımından müəyyən çatışmazlıqlar var. Bəlkə də qaçırılan qol epizodları da bundan irəli gəlir. Futbolda əsas nəticədir. 0:1 uduzmuşuq və bu, faktdır. Yaxşı oynadıq, şansları qaçırdıq və s. Bütün bunlar nəticəni dəyişmir. Xəyallarla yaşamağa dəyməz. Əsas reallıqdır. Ümumi götürdükdə, şikayətlənmək fikrində deyiləm. Həyat da, mübarizə də davam edir və sona kimi istəyimizə çatmaq üçün əlimizdən gələni edəcəyik”.

Şahin Diniyev 2015-2017-ci illərdə çalışdırdığı “Kəpəz”i avrokuboklara daşımışdı. Mütəxəssis bu dəfə rəqib kimi gəldiyi Gəncədə xoş qarşılandığını bildirib: “Gəncə azarkeşləri futbolu bilən, futbolla yaşayan insanlardı. Sağ olsunlar, bu gün də məni çox yaxşı qarşıladılar, hörmətlərini, sevgilərini nümayiş etdirdilər. Buna görə onlara təşəkkürümü bildirirəm”.