Baş katib: “Yeni mövsümdən I Divizion klublarına da pul ayrılacaq”

Yeni mövsüm I Divizionda əvəzedici komandalar iştirak etməyəcək.

Futbolxeber.az saytının məlumatına görə, bu barədə AFFA-nın İcraiyyə Komitəsinin iclasından sonra AFFA-nın baş katibi Sərxan Hacıyev açıqlama verib.

O  bildirib ki, yüksək liqada mübarizə aparan klubların əvəzedici komandaların çempionatı ayrı keçiriləcək.

S.Hacıyev qeyd edib ki, yeni mövsümdən Premyer Liqa klubları kimi, I Divizion təmsilçilərinə də maliyyə yardımı ayrılacaq: “Yeni mövsüm I Divizionda 10 komanda iştirak edəcək. Bu kollektivlərdən 4-ü yeni komandalar olacaq. Çalışırıq ki, hamısı region təmsilçisi olsun. Həmin klublara dövlət tərəfindən maliyyə ayrılacaq. Ümumilikdə, I Diviziona 3 milyon manat ayrılacaq. Bu isə hər kluba 300 min manat deməkdir”.

AFFA-nın baş katibinin sözlərinə görə, 1-ci divizionda çıxış etmək üçün Region Liqasında 3 illik fəaliyyət tələbi ləğv olunub: “Region Liqasında bir il oynayan komandanın da I Diviziona gəlmək ehtimalı olacaq. Onlara hansısa dəstək verilsə, bunun reallaşma ehtimalı var. İcra hakimiyyəti və ya digər dəstəkçilər kömək ola bilərlər”.