"Gent"in baş məşqçisi: "Qarabağ"ın qapıçısını işləməyə məcbur etməliyik”

"Gent"in baş məşqçisi Heyn Vanhazebruk Konfrans Liqasının pley-off mərhələsində "Qarabağ"la evdə keçirəcəkləri cavab oyunu barədə danışıb.

Futbolxeber.az saytının məlumatına görə, təcrübəli mütəxəssis görüşdən əvvəl təşkil olunan mətbuat konfransında öncə heyətdəki problemlər barədə danışıb:

"Zədəli futbolçularımızın vəziyyəti yaxşıdır, lakin bu, onların hamısının oyunda iştirak edə biləcəyi anlamına gəlmir. Ümid edirik ki, Alessio Kastro-Montes sağalacaq. O, artıq bu gün qismən məşq edə bildi. Joe Okumu nəşqdə da bir az iştirak etdi. Lakin bu gün yenidən həkimlərin nəzarətindən keçməlidir. Endryu Hülsager ümumiyyətlə, məşqdə deyildi. Buna görə də onun durumu çox qeyri-müəyyəndir. Digər oyunçular hələ də reabilitasiya mərhələsindədir. Bu dəfə biz Avropada kifayət qədər oyunçumuz olduğu təəssüratı yaratmaq üçün siyahımıza bir neçə gənc oyunçu əlavə etdik (gülür)".

Vanhazebruk vurğulayıb ki, "Qarabağ"a qarşı cavab oyunu çətin olacaq və ilk matçdakından daha diqqətli davranmalıdırlar: "Qarabağ" ilk oyunla müqayisədə son çempionat matçında bizə qarşı oynamış 11 futbolçudan 9-na istirahət vermişdi. Biz isə zədələr səbəbindən hazırda bunu edə bilmirik. Üstəlik, çoxdandır komandanın effektivliyi yoxdur. "Qarabağ"ın statistikasını "Gent"in  müqayisə etsək, bu, daha aydın görünər".

Mütəxəssisin sözlərinə görə, sabahkı oyunda "Qarabağ"a keyfiyyətli komanda olduqlarını göstərmək istəirlər: "İlk oyunda qapıya kifayət qədər zərbə endirə bilmədik. Bu, o qədər də yaxşı deyil. Çərçivəyə düşə bilmirsənsə, qol olmayacaq. İlk oyunda biz rəqibin yaratdığı qol vəziyyətlərinin yarısı qədər qol şansı yaratdıq. Bunun keyfiyyətlə əlaqəsi var. Mən demirəm ki, bizim keyfiyyətimiz yoxdur. Sadəcə olaraq fürsət qazananda həmin vəziyyətdən yararlanmalısan. Rəqibə keyfiyyətə sahib olduğumuzu göstərməli və heç olmasa onların qapıçısını işləməyə məcbur etməliyik. Hədəf seçsəniz, siz də qol vura bilərsiniz. Növbəti mərhələyə keçmək üçün daha dəqiq davranmalıyıq".

Çalışdırıcı oyundan əvvəl komandanın azarkeşlərinə müraciət edib. O, fanatları stadiona bu cür səsləyib: “Əgər növbəti mərhələyə vəsiqə qazansaq, 1/8 finala çıxacağıq. Bu mərhələdə məşhur klublarla qarşılaşa bilərik. Çətin komandalar var, amma keçilə biləcək komandalar da var. Əgər belə bir klubla üz-üzə gəlsəniz, 1/4 finala çıxa bilərsiniz. Kim bilir, daha sonra nələr olacaq. Çətin anlarda komandaya dəstək olmaq çox vacibdir. Bu qələbə həm 600 000 avro gəlir gətirir. Bundan əlavə, belə uğurun klub üçün idman və nüfuz əhəmiyyəti var. Ona görə də sabah yolumuza davam etməliyik”.

Qeyd edək ki, sabah keçiriləcək "Gent" - "Qarabağ" oyunu Bakı vaxtı ilə saat 00:00-da başlayacaq. Bu komandalar arasında ilk matç Ağdam təmsilçisinin 1:0 hesablı qələbəsi ilə yekunlaşıb.