Sayef: “Təəssüf ki, “Gent” “Qarabağ”a qol vura bilmədi”

"Neftçi"nin futbolçusu Kenni Sayef ötən həftə Bakıda "Gent"in baş məşqçisi Heyn Vanhazebruk ilə görüşüb. Görüş Konfrans Liqasının pley-off mərhələsində "Qarabağ"la matçdan əvvəl baş verib.

Futbolxeber.az saytının məlumatına görə, bu barədə futbolçu özü Belçikanın "Nieuwsblad" nəşrinə müsahibəsində bildirib.

29 yaşlı yarımmüdafəçi 2014-18-ci illərdə "Gent"də çıxış edib. Onun görüşünə də keçmiş klubu ilə yaxınlığı səbəb olub. 

"Mən futbolçularla görüşüb onların hazırlığına mane olmaq istəmədim. Amma baş məşqçi və onun heyəti ilə bir araya gəldim. Mən indiyə qədər də Daniel Miliçeviçlə ("Gent"in məşqçisi) danışıram. Biz əsl dostlarıq.  Odur ki, onu yenidən görmək xoş oldu", - deyə Sayef bildirib.

Amerikalı oyunçu "Qarabağ"ın "Gent"ə 1:0 hesabı ilə qalib gəldiyi görüşü izlədiyini də söyləyib: "Əlbəttə, oyuna baxdım. Birinci hissədə "Gent"in bir neçə yaxşı imkanı oldu. Təəssüf ki, onlar qol vura bilmədilər. Səfərdə "Qarabağ"a 0:1 hesabla uduzmaq pis nəticə deyil. "Nant" burda (Bakıda) ciddi məğlubiyyətlə üzləşdi. Əlbəttə, "Gent"in mərhələ adlamaq şansı var. Onlar öz meydanında, azarkeşləri önündə böyük uğur qazana bilirlər".

Sayef "Qarabağ"a  ehtiyatla yanaşmağın vacibliyini bildirsə də, "Gent"ə inandığını da söyləyib: "Onlar bu mövsüm nəyə qadir olduqlarını göstəriblər. Amma mən əvvəlkitək "Gent"ə, baş məşqçi Heyn Vanhazebruka inanıram. Siz güvənin ki, o, vəziyyəti dəyişmək üçün taktiki variantlar düşünəcək. Azarkeşlərinin dəstəyi sayəsində isə "Gent" çox şey edə bilər. Mən orada oynayanda bir çox komandanı məğlub etmişik. İndi "Gent" niyə də "Qarabağ"a qalib gəlməsin?"

Sayef özünün hazırkı karyerası barədə də danışıb: "Burada çox çalışır, tənbəllik etmirəm. Son illər aldığım zədələrdən sonra indi karyeramda yaxşı bir mərhələdir. Ümid edirəm ki, bir gün Belçikaya qayıdacağam. Hazırda fevral ayıdır. Mənim hesabımda 7 qol və 8 qolun ötürməsi var. Hamıya sübut etmək istəyirəm ki, yenidən formadayam. Şükür ki, iki ildir zədəm yoxdur, sağlamam".

Xatırladaq ki, "Qarabağ"la "Gent" arasında cavab görüşü fevralın 23-də Belçikada keçiriləcək.