“Bu əməkdaşlıq hər iki tərəf üçün xeyirli olacaq”

“Turan Tovuz” sevərləri təbrik edirəm. Bu gün kluba yeni sponsorun cəlb olunması çox müsbər məqamdır. Bu əməkdaşlıq hər iki tərəf üçün xeyirli olacaq”.

Futbolxeber.az saytının məlumatına görə, bu sözləri “Turan Tovuz”un yaradıcılarından olan Vidadi Əhmədov Tovuz klubu ilə “Huner Group” arasında sponsorluq müqaviləsinin imzalanma mərasiminda deyib.

Çıxışı zamanı V.Əhmədov “Turan Tovuz”un tarixində də söz açıb: “Turan” Azərbaycanı Avropada təmsil edən ilk klub olub. Həmin vaxt UEFA kubokunda rəqibimiz “Fənərbaxça” idi. Püşkatma mərasimindən qayıdarkən İsveçrədən İstanbula uçdum. Orada hava limanında məni jurnalistlər qarşıladılar və hansı hisslər keçirdiyimi soruşdular. Təbii ki, sevindiyimi dedim. “Turan”ın Azərbaycanı Avropada təmsil etməsi çox xoş məqam idi. Rəqibin Türkiyə klubu olması səbəbində İstanbulda bizə çox böyük maraq vardı. İstanbula Bakıya uçarkən isə cəmi 2-3 jurnalist qarşıladı. Buna görə məyus olmuşdum. Amma çox sevinirəm ki, bu gün Tovuzdakı tədbirdə xeyli jurnalist iştirak edir. Futbol ictimaiyyətimiz də inkişaf edib. Belə sponsorlar klublara kömək edirlər. “Huner Group” şirkətinə də komandaya dayaq olduğu üçün Tovuz ictimaiyyəti adından təşəkkür edirəm”.

İbrahim CƏFƏROV