“Turan Tovuz” “Huner Group”la sponsorluq müqaviləsi imzaladı

Bu gün “Turan Tovuz" ilə "Huner Group" arasında əməkdaşlıq (sponsorluq) müqaviləsi imzalanıb.

Futbolxeber.az saytının məlumatına görə, tədbirdə "Huner Group"un təsisçisi Ehtiram Quliyev, "Turan Tovuz" FK-nin İdarə Heyətinin sədri Rəşid Məhərrəmov, Futbolun İnkişafı Fondunun icraçı direktoru Tural Piriyev iştirak edib və digər şəxslər iştirak ediblər.

İmzalanma mərasimində çıxış edən Rəşid Məhərrəmov əvvəlcə Türkiyədə baş verən zəlzələ ilə əlaqədar qardaş ölkəyə başsağlığı verib. Komandanın tarixi barədə danışan Rəşid Məhərrəmov müstəqillik dövründə Tovuz təmsilçisinin çıxışına toxunub. O, “Turan Tovuz"un 9 illik fasilədən sonra ötən il Premyer Liqaya qayıtdığını xatırladıb. Rəşid Məhərrəmov bunda Futbolun İnkişafı Fondunun da rolu olduğunu vurğulayıb.

Klubun yaradıcısı Vidadi Əhmədov isə öz çıxışında “Huner Group”la əməkdaşlığın uğurlu olacağına inandığını deyib. O, kluba verilən bu dəstəyin komandanın və ümumilikdə Tovuz futbolunun inkişafında xüsusi rola malik olacağını qeyd edib.

Futbolun İnkişafı Fondunun icraçı direktoru Tural Piriyev sözügedən sponsorluq müqaviləsinin, atılan bu addımın uzunömürlü olması üçün çalışacaqlarını vurğulayıb. FİF rəhbəri bu tərəfdaşlığın digər bölgələrdə futbolun inkişafına təsir göstərəcəyinə ümid etdiyini bildirib.

“Huner Group"un təsisçisi Ehtiram Quliyev çıxışında əvvəlcə Türkiyədə baş verən zəlzələyə görə qardaş xalqa başsağlığı verib. “Turan Tovuz” və ümumilikdə Azərbaycan futboluna dövlət dəstəyindən danışan Ehtiram Quliyev Tovuz təmsilçisinin tarixi inkişafında sözügedən faktorların danılmaz olduğunu qeyd edib.

Sonda "Huner Group" təsisçisi Ehtiram Quliyev, FİF icraçı direktoru Tural Piriyev və "Turan Tovuz"un idarə heyətinin sədri Rəşid Məhərrəmovun iştirakı ilə imzalanma mərasimi keçirilib. Tərəflər arasında müqavilə 4 il yarım müddətinə nəzərdə tutulub.

Jurnalistlərin suallarını cavablandıran “Huner Group”un təsisçisi Ehtiram Quliyev deyib ki, “Turan Tovuz" üçün avtobus alışına dəstək olacaqlar.

O, Tovuzda futbola marağın artırılması üçün bacardıqları qədər yüksək səviyyədə işlər həyata keçiriləcəklərini qeyd edib. Ehtiram Quliyev komanda birinci diviziona düşsə belə, sponsorluq müqaviləsinin davam edəcəyini vurğulayıb. E.Quliyev yaxın zamanlarda digər iş adamlarının da futbola sponsorluq edəcəyinə inamını ifadə edib.

İbrahim CƏFƏROV