Rəşad Sadıqov: “Qurban Qurbanovun məşqçiliyi mənim üçün kitabdır”

“Zirə”nin baş məşqçisi Rəşad Sadıqov Azərbaycan Premyer Liqasının XXI turunda “Qəbələ”yə qarşı keçirilən oyun bardə danışıb.

Futbolxeber.az saytının məlumatına görə, o, 2:2-lik heç-heçəni belə şərh edib:

“Bəzən oyunu şərh etmək üçün insan çətinlik çəkir. İlk dəqiqələrdə qol buraxsaq da, tez toparlandıq. Qol epizodlarımız, dirəyə dəyən topumuz oldu. Qələbə qazanmaq istəyirdik. Oyundan çox razıyam. Komandam son 3 turdur yaxşı oynayır. 90 dəqiqə ərzində yol verdiyimiz bəzi kobud epizodları aradan qaldırsaq, daha da yaxşı olacaq. Oyundan sona komandamı təbrik etdim. Etməsəm, ədalətsizlik olardı”.

Rəşad Sadıqov məşqçilik karyerasını Qurban Qurbanovun karyerasını bənzədir: “Hər bir komandanın heyətində yaxşı futbolçular olur. Komponentlər üzərində bəzi məqamları artırmalıyıq. Son oyunlarda qələbə qazana bilərdik. Bəzi məqamlar çatışmırdı. Bu gün penaltidən yararlana bilmədik. Qırılma hadisələri çox baş verir. Daha çox qol vura bilərik, daha çox qələbə qazana bilərik. Mən “Qarabağ”da oynayanda da belə hadisələr çox olurdu. Qurban müəllimin məşqçiliyi mənim üçün kitabdır. Məşqçi karyeramı onun məşqçilik karyerasına bənzədirəm. Komandam düzgün yoldadır. Sadəcə inkişaf etmək lazımdır”.

O, hakimlərin idarəçiliyi barədə sualı belə cavablandırıb: “Bu oyunda ciddi, qaranlıq qalan epizod olmadı. Hakimlər görüşü çox yaxşı idarə etdilər. Bu, futboldur. Hakimlərdə də, VAR-da da, elə bizim özümüzdə də səhvlər ola bilər”.

“Zirə”nin çalışdırıcısı Hacıağa Hacılı əvəzlənməsinin səbəbini belə izah edib: “Hacı elə futbolçudur ki, ona xəbərdarlıq edirəm ki, sarı vərəqə alırsansa, əvəzlənəcəksən. İkinci hissə üstünlük bizim tərəfimizdə idi. Onu ona görə əvəzlədim ki, üstünlüyü qoruyub saxlaya bilək. “Qəbələ” də yaxşı çıxış etdi. Elmar müəllim mübariz komanda formalaşdırıb”.

Sadıqov Təmkin Xəlilzadəni futboldan kənar amillərə görə komandadan göndərmədiyini vurğulayıb: “Təmkin Xəlilzadə ilə bağlı olan məsələ futboldan kənar deyil idi. Ona karyerasında uğurlar arzu edirəm”.

Fərəc ASLANOV