Elmar Baxşıyev: “Hər iki komanda qələbəyə layiq idi”

“Qəbələ”nin baş məşqçisi Elmar Baxşıyev Azərbaycan Premyer Liqasının XXI turu çərçivəsində “Zirə”yə qarşı keçirdikləri oyun haqda (2:2) danışıb.

Futbolxeber.az saytının məlumatına görə, o, matçdan sonra keçirilən mətbuat konfransında heç-heçəni belə şərh edib:

“Düşünürəm ki, maraqlı və intensiv oyun alındı. Hər iki komanda qələbəyə layiq idi. Təxmin edirdik ki, ağır oyun olacaq. Matça 2 gün qalmış Məqsəd İsayev və İsnik Aliminin səhhətlərində problemlər var idi. Komandama təşəkkür edirəm. Əzmkarlıq göstərdilər. Layiqli xal qazandıq”.

Daha sonra o, jurnalistlərin suallarını cavablandırıb:

- Rövlan Muradov sanki meydana futbol oynamaq üçün çıxmamışdı, çox kobud oynayırdı...

- Kobudluq yox idi. Futbol mübarizəni sevir. Futbolçularım mübarizədən çəkinmirdilər.

- İsnik Alimi əvəzlənərkən sizinlə görüşmədi, birbaşa paltardəyişə otağına yollandı. Buna səbəb nə idi?

- Oyunçularım məndən küsə bilməzlər. Mən onların hörmətini saxlayıram, onlar da mənim. Səhhətində problem var idi deyə İsnik Alimiyə bildirdim ki, birbaşa paltardəyişmə otağına yollansın.

Fərəc ASLANOV