Kenni Sayef: "Müasir futbol təkcə ayaqla oynanılmır"

"Müasir futbol təkcə ayaqla oynanılmır, başdan da istifadə etmək lazımdır".

Futbolxeber.az saytının məlumatına görə, bunu "Neftçi"nin futbolçusu Kenni Sayef fərqli mövqelərdə oynaması barədə klubun rəsmi televiziyasına açıqlamasında deyib

30 yaşlı yarımmüdafiəçi bildirib ki, meydanın hər yerində ən yaxşısını etməyə çalışır: "Baş məşqçinin verdiyi tapşırığa uyğun oynayıram. Yeni mövqelərdə özümü sınamağı xoşlayıram".

Türkiyənin Antalyada davam edən təlim-məşq toplanışını dəyərləndirən ABŞ millisinin sabiq üzvü hazırlığın çox yaxşı getdiyini söyləyib: "Düzdür, toplanışın əvvəlində bir çox oyunçumuz zədəli oldu. Bizimlə tam məşq keçə bilmədilər. Buna baxmayaraq, bizim üçün çox faydalı hazırlıqdır. Bir-birimizi həm meydanda, həm də kənarda daha yaxşı tanımağa başlayırıq. Ümumi götürsək, hər şey qaydasındadır".

O, Portuqaliyanın "Arouka" klubuna keçən Yusuf Lavalın "Neftçi"ni tərk etməsinə də toxunub: "Ona hər şeyin ən yaxşısını arzulayıram. Komandamız üçün önəmli oyunçulardan idi. Amma özü qərar verdi və getdi, buna hörmətlə yanaşırıq. Yusufu çox sevirik. Onun gedişinin komandaya təsir edib-etməyəcəyini zaman göstərəcək. Rəsmi oyunlar başladıqdan sonra bunu görə biləcəyik. Biz futbolçuyuq, meydanda tapşırıqları yerinə yetiririk. Digər məsələlər baş məşqçinin işidir".