"İstəyirik ki, "Səbail"ə qarşı göstərdiyimiz oyunu bu matçda da göstərək"

"Şamaxı"nın baş məşqçisi Vüqar Əsgərli komandanın Türkiyədəki təlim-məşq toplanışı barədə danışıb.

Futbolxeber.az saytının məlumatına görə, o, Qazaxıstan "Kaysar"ı ilə qolsuz heç-heçə etdikləri yoxlama matçından sonra klubun feysbuk səhifəsinə açıqlamasında deyib: 

"O qədər də uzunmüddətli fasilə olmadı. 10 günlük fasilə var idi. Amma futbolçularımıza tapşırmışdıq ki, yükləmələrdən başlamalıyıq. Toplanışa Bakıda start verdik. Buraya gələndən sonra isə gündə 2 dəfə məşq edirik. Bu görüşdə istəyirdik ki, futbolçular iki komandanın ikisi ilə də 90 dəqiqə oynasınlar. Qarşımızda 1 həftə var. O 1 həftə ərzində günə 2 məşq planlaşdırmışıq. Oyunçular sabah istirahət edəcəklər. Sonra yenə məşqlərə başlayacağıq. Məşq etmək üçün bütün şəraitimiz var. Buna görə klub rəhbərliyinə təşəkkürümüzü bildiririk. Hər bir şərait yaradılıb. Oyunlar, qidalanma, məşq meydançaları - hər şey yüksək səviyyədədir. Ayın 18-də də 1 oyunumuz var. İstəyirik ki, çempionatımızda "Səbail"ə qarşı göstərdiyimiz oyunu bu matçda da göstərək".

Qeyd edək ki, "Şamaxı" bu gün daha bir görüş keçirəcək. Komanda Rumıniyanın "Botaşani" klubuna qarşılaşacaq. Bu oyun isə Bakı vaxtı ilə saat 18:30-da başlayacaq.  "Şamaxı" toplanışın son matçında yanvarın 18-i Serbiyanın "Napredak" klubu ilə üz-üzə gələcək.