Elmar Baxşıyev: “Komanda olaraq möhkəmik”

“Qəbələ”nin baş məşqçisi Elmar Baxşıyev Azərbaycan Premyer Liqasının XIII turu çərçivəsində “Zirə”yə qarşı keçirilən matçdan sonra mətbuat konfransı keçirib.

Futbolxeber.az saytının məlumatına görə, o, komandasının qələbəsi (1:0) barədə bunları deyib:

“Oyunun çətin keçəcəyini bilirdik. “Zirə” güclü rəqibdi. İlk dəqiqələrdən sona kimi oyundan qopmadıq. Komandamızı təbrik edirəm. Amma azarkeşsiz futbol olmur. Bugünkü qələbəni azarkeşlərimizə həsr edirik. Bu, onların qələbəsidi”.

- Ülvi İsgəndərovu meydana buraxdız və o, baxımlı qol vurdu. Bunu necə şərh edərdiz?

- Ülvidən hər zaman qeyri-adi nəsə gözləmək olar. O, çempionatda ən qeyri-adi hücumçulardan biridi. Hər an matçın  taleyini həll edə bilər.

- Kapitan Asif Məmmədovun bu gün start heyətində yer almamasının səbəbi nə idi?

- Asifin mikro zədəsi var idi. Buna görə də bu gün ilk “11-lik”dən kənarda qalmışdı.

- “Neftçi” ilə oyunöncəsi bu qələbə komandanızı necə motivasiya edəcək?
- Hamı bizim məğlubiyyəti bir cür müzakirə edir. Amma bizim heç bir sıxıntımız yoxdu. Komanda olaraq möhkəmik. Həm psixoloji, həm də hazırlıq baxımından tam hazırıq. Ötən oyunda uduzsaq da, sona kimi vuruşduq. Təbii ki, bəzi oyunlarda udacaqsan, bəzilərində uduzacaqsan. Çalışacağıq ki, avrokuboklar uğrunda mübarizədən qoymayaq.

- Qələbəyə baxmayaraq, komandanızın sərgilədiyi oyundan razı qaldız?

- Futbolçuları da bir az başa düşmək lazımdı. Boş tribunalar önündə oynamaq çox çətindi. Sanki məşq edirsən. Ümid edirəm, bir də bu cür hal təkrarlanmayacaq.

- Ülvi İsgəndərov istedadlı futbolçu olsa da, milli səviyyəsinə yüksələ bilmir. Sizin fikrinizcə, onda nə çatışmır?

- Xarakter olaraq bir az dəyişməlidi. Amma onda olan bir çox komponentlər əksər futbolçularda yoxdu.