"Qol vuranda da istefa qışqırırlar"

"Kəpəz" Azərbaycan Premyer Liqasının 4-cü turunun oyununda "Səbail"ə 1:4 hesabı ilə məğlub olub. Futbolxeber.az saytının məlumatına görə, oyunsonrası mətbuat konfransında Gəncə təmsilçisinin baş məşqçisi Yaşar Vahabzadə əvvəlcə qarşılaşma haqda fikirlərini bölüşüb:

- İlk hissədə üstünlük bizdə idi. Qol imkanlarımız var idi, istifadə etməli idik. İkinci hissəyə pis başladıq, qapımızda qol gördük. Daha sonra öz səhvimizdən ikinci qolu buraxdıq. Sonra qırmızı vərəqə və nəticədə 1:4 hesabı ilə məğlub olduq. Komandam futbol oynamaq istəyirdi. Azlıqda qalanda da müdafiəyə oturmurdular. 

 - Rauf Əliyev matçda sonra çox aqressiv idi. Mahmud Qurbanovun üzərinə hücum edirdi. Bunun səbəbi nə idi?

- Futboldur, uduzduq. Qalib komandanı təbrik edirəm. Oyundan sonra belə şeylər xoşagəlməzdir. Mən görməmişəm, amma olubsa, haqq qazandırmıram. Raufa yaraşmaz özündən böyüyə hörmətsizlik etmək. Mahmud Qurbanov Azərbaycanda tanınmış futbolçu olub. Bu məsələni öyrənərəm.

- Gəncəli azarkeşlər sizi niyə qəbul etmir. Bu, gəncəli futbol veteranlarının sifarişidir, yoxsa başqa səbəb var?

- Bu sualı onlara vermək lazımdır. Mən başa düşə bilmirəm. Düzdür, komanda uduzur, istefa qışqırırlar. Amma biz qol vuranda da istefa qışqırırlar. Bakıda "Neftçi" ilə oyunda da olduğu kimi. "Neftçi" elə-belə komanda deyil. Onlara qol vurmağa hər komanda çətinlik çəkir. Qol vururuq, istefa qışqırırlar. Bu, birinci dəfə deyil. Ötən mövsüm qələbə qazandığımız oyunlarda da belə idi. Mən özüm də başa düşə bilmirəm. Allah bilən məsləhətdir.

- Azarkeşləri avtobusla klub gətirir ki, sizi istefaya səsləsinlər?

- Nə deyə bilərəm?.. Təzyiqlər böyükdü. Bu, futbolçulara da mənfi təsir edir. Oyunçular da rahat oynaya bilmir.

- Hakimlikdən yaman narazı idiniz...

- Olur da, hamıda emosiya olur. Oyundan sonra əl sıxdıq.

- Rəqib hesabı bərabərləşdirərkən futbolçunuz Kantariyanın meydana qayıtmasına hakim niyə imkan vermirdi? 

- Altdan geyindiyi paltarda problem var idi. Ancaq bu, oyundan əvvəlki forma idi. Niyə qol epizodunda kənarda qalmışdı, bilmirəm.