Fernandu Santuş: "Azərbaycan millisinə qarşı gücümüzü meydanda qoymasaq...”

"Hər oyun bir finaldır və oyunçular bunu bilməlidirlər. Azərbaycana qarşı favorit olduğumuzu bilirik, amma hörmət etməsək və öz gücümüzü meydana qoymasaq, çox böyük problemlərimiz ola bilər. Qələbələr meydanda qazanılır".

Futbolxeber.az saytının məlumatına görə, bu sözləri Portuqaliya millisinin baş məşqçisi Fernandu Santuş DÇ-2022-nin seçmə mərhələsinin ilk turunda Azərbaycan yığması ilə oyun öncəsi mətbuat konfransında deyib.

O, qarşılaşmaya ciddi yanaşmalı olduqlarını vurğulayıb: “Komandada əhval-ruhiyə həmişə olduğu kimidir. Fikrimizi oyundan-oyuna yönəldirik. Gün ərzində rəqib haqqında daha çox məlumat toplayacağıq. Oyunu mürəkkəbləşdirsək, bizim üçün çətin olacaq. Bu oyuna son dərəcə ciddi, peşəkarlıq və həvəslə yanaşmalıyıq. Çünki sabah uğur qazanmaq istədiyimiz yeni bir mərhələyə başladığımızı anlamalıyıq”.

Santuş qrupdakı hər oyunu finala bənzədib: “Sabahkı görüşə hazır olacağımıza şübhə etmirəm. Rəqib 35-40 metr aralığında toplaşacaq. Biz rəqibin kəskin əks-hücumlarında diqqətli olmalı və standart vəziyyətlərə fikir verməliyik. Futbolçularım millidə oynayanda yüksək motivasiyalı olur. Cəmi 8 oyunumuz var və hər biri finala bərabərdir”.

Portuqaliya yığmasının çalışdırıcısı komandasının lideri Kriştiano Ronaldo haqda da danışıb: "Şübhəsiz, komandamız üçün əsas oyunçudur. Dünyanın ən yaxşı oyunçularından biri və bəlkə də bir nömrəsidir. Ancaq təkcə onu fərqləndirə bilmərik, bir çox başqa elit oyunçumuz var. Bütün bunların sonunda komanda qələbə qazanır. Ronaldo ilə bağlı deyilən tənqidlər haqda danışmağa dəyməz. Çünki onun haqqında fikirlərimi hər kəs yaxşı bilir”.