Aftandil Hacıyev: “Belə epizodları ona bağışlamaq olar”

Azərbaycan Premyer Liqasının XIX turu çərçivəsində səfərdə “Qəbələ”ylə 1:1-lik bərabərliyə qalan “Səbail”in baş məşqçisi Aftandil Hacıyev mətbuat konfransı keçirib.

Futbolxeber.az saytının məlumatına görə, A.Hacıyev əvvəlcə oyun haqda fikirlərini bölüşüb.

- Qəbələ səfəri hər zaman çətin olur. Bu, hər bir komandaya aiddi. Hava durumu bir qədər ağır olur. İlk hissədə həqiqətən çətin idi. Amma fasiləyədək yaxşı epizodlar yaxalamışdıq. Rəqib keyfiyyətli futbolçulara sahibdir. Futbolçularımız sonadək əzmkar mübarizə apardı. Bu matçı unudub, növbəti görüşə hazırlaşmalıyıq. Peyman Keşavarz və Henrik Ekşteynsiz bizə çox çətin idi. Amma 1 xalı qazanmağı bacardıq.

- Ruslan Hacıyevin qırmızı vərəqə aldığı epizodu şərh edərdiniz...

- Ruslan hücumda effektiv olsa da, müdafiədə bunu edə bilmir. Gəncdi, bu cür epizodları ona bağışlamaq olar. Xeyli vaxt idi start heyətində meydana çıxmırdı.

- Ekşteyn niyə yox idi?

- “Keşlə”ylə oyunun sonlarında zədələnmişdi. Həkim müayinəsindən sonra 2-3 həftəlik sıradan çıxdığı müəyyənləşdi. Yəqin ki, millinin oyunları ilə bağlı yaranacaq fasilədə tam bərpa olacaq (sport24.az).