"Qarabağ" mövsümün əvvəlindən əsasnaməni pozur

“Qarabağ” Azərbaycan Premyer Liqasının əsasnaməsini pozub.

Futbolxeber.az saytının məlumatına görə, əsasnaməsədə qeyd olunur ki, Azərbaycan Premyer Liqasının oyunları çərçivəsində meydana çıxan futbolçular ad, soyad və ya nikneymdən (təxəllüs) istifadə edə bilərlər və bu, Azərbaycan əlifbası ilə yazılmalıdır. Ağdam klubunun üzvü Uroş Matiçin formasında yer alan sonuncu hərf isə Azərbaycan əlifbasında yoxdur.

Bu isə o deməkdir ki, “Qarabağ” artıq 15 turdur əsasnaməni pozur. Qəribədir ki, Matiç mövsümün əvvəlindən meydana bu cür formada çıxsa da, geridə qalan müddətdə futbolçunun ilə bağlı hər hansı cəza tədbiri görülməyib. Halbuki əsasnamənin pozulması faktı açıq-aşkar ortadadır.

Məsələ ilə bağlı Futbolxeber.az saytına açıqlama verən Peşəkar Futbol Liqasının İnformasiya və İctimaiyyətlə Əlaqələr Departamentinin rəhbəri Aslan Şahgəldiyev yalnız əsasnamənin tələbini qeyd etməklə kifayətlənib: “Əsasnaməyə görə, futbolçuların üzərində ad, soyad, yaxud ləqəbləri yazıla bilər və bunlar Azərbaycan əlifbası ilə yazılmalıdır. Digər məsələlərlə bağlı isə şərh verə bilmərəm”.

PFL rəsmisinin "Qarabağ"a qarşı hansı cəza tədbiri görüləcəyi ilə bağlı danışmaması başa düşüləndir. Çünki əsasnamənin pozulması ilə bağlı İntizam kodeksi var və bu məsələ haqda AFFA İntizam Komitəsi qərar qəbul etməlidir. Gec də olsa - yalnız çempionatın 15-ci turunda - belə bir problem aşkarlanıbsa, İntizam Komitəsi məsələni araşdırmalı və "Qarabağ"a lazımi cəzanı verməlidir. Çünki təqdim etdiyimiz fotolardan da Matiçin formasında əsasnamənin pozulması açıq-aşkar görünür. Əsasnamədə isə "Başqa əlifbadan istifadə edən klublar cəzalandırılacaq" qeydi var.