"Neftçi"nin legioneri milliyə bəstəboy olduğu üçün çağırılıb

Qvineya millisinin baş məşqçisi Didye Siks "Neftçi"nin futbolçusu Mamadu Kaneni Afrika Millətlər Liqasının Çadla oyunlarına çağırmasının səbəbini açıqlayıb.

Futbolxeber.az saytının məlumatına görə, fransalı mütəxəssis 23 yaşlı yarımmüdafiəçiyə boyunun uca olmaması səbəbindən dəvət göndərdiyini söyləyib.

O hesab edir ki, süni örtüklü meydanda keçiriləcək görüşdə Kane daha effektli ola bilər: "Qarşıdakı matçda yerlə oyuna üstünlük verəcəyik. Bəlkə də Kanenin milliyə dəvəti bununla bağlıdır. Çünki onun boyu qısadır və bu, süni örtükdə oyunçu üçün üstünlük yaradır. Fikrimcə, Kane bu cür meydanda maraqlı seçim ola bilər. İbrahima Kamaranı isə ucaboy olduğu üçün yığmaya çağırmadım".

Qeyd edək ki, Qvineya millisi 11 oktyabr və 15 oktyabrda Çadla iki oyun keçirəcək.