De Byazi “Məğlubiyyətdən sonra qələbə qazanmaq istəyi, əzmi daha da artır”

“İlk oyunda evdə Lüksemburqa məğlub olduq. Buna görə çox məyus və əsəbiyik”.

Futbolxeber.az saytının məlumatına görə, bu sözləri milli komandamızın baş məşqçisi Canni De Byazi UEFA Millətlər Liqası çərçivəsində sabah Kiprə qarşı keçiriləcək oyundan öncə təşkil olunan mətbua konfransında deyib.

İtaliyalı mütəxəssis bildirib ki, oyun çox çətin keçəcək: “Sabah Kiprlə oyunda situasiyanı xeyrimiz dəyişməyə çalışacağıq. Onlar da ilk oyunda məğlub olub. Kiprlə oyun bizim üçün yeni mübarizə olacaq. Futbolçularım hər şeyi anlayır. Çox çətin oyun olacaq. Havanın isti olması işimizi çətinləşdirə bilər. Sabah yaxşı oyun gözləyirəm. Qələbə qazanmaq üçün əlimizdən gələni edəcəyik”.

De Byazi vurğulayıb ki, komandanı oyuna kökləmək çətin deyil: “İlk oyunda pozitiv məqamlar gördük. Məğlubiyyətdən sonra qələbə qazanmaq istəyi, əzmi daha da artır. Bu mənada komandanı psixoloji baxımdan oyuna kökləmək elə də çətin deyil. Uşaqlar da azarkeşləri sevindirmək üçün çalışacaqlar. Heyətimizdə gənc və yaxşı oyunçularımız var. Komandanın tam formalaşması üçün müəyyən qədər zamana ehtiyacımız var. Ümid edirəm, sabah oyunu azlıqda qalmadan başa vuracağıq”.

Yığmamızın çalışdırıcısı kapitan Maksim Medvedevlə bağlı da danışıb: “Bizim iki kapitanımız var. Biri meydanda olur, digəri isə mənim yanımda. Mətbuatda gedən yazılardan məlumatım var. Maksimin oyundan sonra verdiyi reportaj əsnasında səsləndirdiyi fikirlər sırf reportajın necə keçməsi ilə əlaqəli idi. Komandamıza sakit atmosfer lazımdır”.

İtaliyalı çalışdırıcı meydana müdafiə meylli heyət buraxması fikri ilə razılaşmayıb: “İlk oyunda qırmızı vərəqə aldıqdan sonra taktiki dəyişiklik etdik. Niyyətimiz daha çox hücum futbolu oynamaq idi. İki hücumçu ilə mübarizə aparırdıq. Müdafiə meylli heyət buraxmağım fikri ilə razı deyiləm. Bizim oyunumuz rəqibimiz gücündən asılıdır. Oyun ərzində azlıqda qalmasaydıq və penalti olmasaydı, rəqib bizə çətin qol vurardı”.