Tərlan Əhmədov: "Tovuzda oynayanda "Qrad" məndən 500-600 metr aralıda düşdü"

“Vətənimiz üçün canlarını vermiş şəhidlərin ailələrinə başsağlığı verirəm. Hər bir Azərbaycan vətəndaşı kimi mən də Ali Baş Komandanın ümumi səfərbərlik barədə əmrini gözləyirəm. Canımı ölkəmizin bütövlüyü üçün məmnuniyyətlə fəda edərəm.  Baxmayaraq ki, elə indi də əlimə silah götürməyə və Vətənimizin düşməndən azad edilməsi uğrunda mübarizə aparmağa hazıram".

Futbolxeber.az saytının məlumatına görə, bu fikirləri sport24.az-a açıqlamasında "Keşlə"nin baş məşqçisi Tərlan Əhmədov deyib.

49 yaşlı mütəxəssis komanda yoldaşları ilə birlikdə top atəşi altında oynamaq məcburiyyətində qaldığı Qarabağ müharibəsi illərini də xatırlayıb: "Yadımdadır, Tovuzda oynayanda "Qrad" məndən 500-600 metr aralıda düşdü. Xoşbəxtlikdən partlayış baş vermədi. Bütün bunları gördük. Bu gün də tərəddüd etmədən silah götürməyə və Vətənim uğrunda son damla qanımadək vuruşmağa hazıram".

Qeyd edək ki, Əhmədov ilk milli çempionatımızda - 1992-ci il mövsümündə "Turan"da çıxış edib.