“Kəpəz”in qaş düzəldən yerdə vurub göz çıxarması...

Dünən saytları “Kəpəz”in “Biz Birlikdə Güclüyük” aksiyası çərçivəsində Gəncədə yardım sovqatları paylaması barədə xəbər və fotolar bəzədi. Klub tərəfindən şəhərin müxtəlif ərazilərində yaşayan veteran futbolçular, həmçinin, şəhid və aztəminatlı azarkeş ailələri gündəlik qida məhsullarından ibarət ərzaq sovqatı ilə təmin ediliblər. Əslində, təşəbbüs gözəldi. Normalda alqışlanası addımdı. Amma gəl ki, bir məqam edilən yaxşılığı heçə endirir. Həmin məsələyə keçməmişdən öncə diqqətimizi çəkən başqa bir məqama fikir bildirmək istərdik.

Fotolara baxanda görünür ki, “Kəpəz”in nümayəndələrindən heç kim qoruyucu maskadan istifadə etmir. Halbuki karantin vaxtıdı və virusun yayılmasının qarşısını almaq üçün ilk növbədə məhz qoruyucu maskalardan istifadə olunmalıdı. Belə çıxır ki, Gəncədə koronavirus yoxdu? Varsa, niyə klub nümayəndələri maskadan istifadə etmirlər? Yoxsa “Kəpəz”in üzvləri taxmağa maska tapmırlar? Maskaya bir quş...

Xeyriyyə aksiyasında ən çox diqqətçəkən məqam isə aşağıda gördüyünüz qanqaraldıcı fotodu.

Niyə qanqaraldıcı? Çünki bu şəkildə utana-utana ərzaq qutusunu alan Rövşən Əhmədovdu. O Rövşən Əhmədov ki, uzun illər “Kəpəz”in formasını geyib, Gəncə klubunun heyətində Azərbaycan çempionu, eləcə də ölkə çempionatının bombardiri olub.

Foto Feysbukda paylaşılan andan müzakirələrə səbəb oldu. Əksəriyyət ürəkağrıdıcı fotoya görə klub rəhbərliyini qınadı. Elə veteran futbolçu özü də fotosunun yayılmasından narazıdır. Əhmədov bu gün “Qafqazinfo”ya açıqlamasında deyib: “Açığı, istəməzdim ölkə çempionatının bombardiri, 3 dəfə çempion olmuş biri kimi bu foto yayılsın. Ancaq neyləmək olar?”

Görəsən, həmin fotonu yayanlar bu sözləri oxuyub, heç olmasa utanırlarmı? Axı nə məcbur idi klubun tarixində iz qoymuş bir futbolçunu belə aşağılamaq? Guya başqa foto yoxdu? Rövşən Əhmədovun boynubükük dayandığı bu fotonu paylaşmasaydız, dünya dağılacaqdı? Ayıbdı bəylər, insanların qüruru ilə oynamayın. Yetər artıq. Bu, təkcə “Kəpəz”in nümayəndələrinə aid deyil. Etdiyi yaxşılıqları reklam edən, gözə soxan hər bir kəsə aiddi. İlk gündən bu məsələyə etiraz etdik, gəl ki bəziləri (elələri futbol cameəsində də var) guya digərlərinin də yaxşılıq etmələri üçün bu addımı atdıqlarını bildirdilər. Halbuki dinimiz də edilən yaxşılığın gizli qalmasını tələb edir. Amma təəssüf ki, indi əsas məsələ özünü reklam etməkdi...

İBRAHİM