Ölkə futbolu

Rövlan Muradov: "Qrupa da düşərik, niyə də yox?"

Şriftin ölçüsü:

09.07.2019 13:33

“Qəbələ”nin hücumçusu Rövlan Muradov Futbolxeber.az saytına müsahibə verib. Gənc futbolçu komandasının Türkiyədəki hazırlığı haqda danışıb. Bununla yanaşı “Qəbələ”nin avrokuboklardakı şanslarını dəyərləndirib:

- Türkiyədəki hazırlıqlar necə gedir? “Maripol”la yoxlama görüşü keçirdiniz. Necə alındı həmin görüş?

- Şükür Allaha hər şey qaydasında gedir. Bəli, ilk yoxlama görüşündə qələbə qazandıq. Amma rəqibimiz heç də zəif komanda deyildi. Onlar avrokuboklara üçüncü mərhələdən başlayacaq, çox güclü komandadılar. Oyun istədiyimiz kimi alındı və qələbə qazandıq. Komandamızda istək, inam yüksək idi.

- İkinci yoxlama görüşünüz də Ukrayna klubuna qarşı olacaq, “Vorskla” ilə oynayacaqsınız. Necə düşünürsən komanda ikinci görüşdən sonra daha da istədiyi oyun tempini əldə edə biləcək?

- Bəli, “Vorskla” ilə oynayacağıq, onlar da güclü komandadı. Bu oyunlar komanda şəklində uyğunlaşmağımız üçün, bizim üçün sınaqdı. İnanıram ki, gözəl oyunla qələbə qazana bilərik.

- Komandaya yeni legioner gəlib. Fernan Ferreyroa, Merab Qiqauri və Kristian Kuaku transfer edilib. Onlar sizə kömək edəcək gücdədi?

- Bəli, üç yeni oyunçumuz var. Üçü də komandaya güc qatmağa gəlib, çalışırlar. Fikrim də müsbətdi onlar haqda. Komandaya da artıq öyrəşiblər. Daha da uyğunlacağına inanıram.

- Necə fikirləşirsən, bir neçə legionerə də ehtiyacınız da var, yoxsa bu heyət istədiyiniz nəticələri əldə etməyə yetər?

- Bunu baş məşqçi və rəhbərlik bilər. Bizim işimiz meydanda var gücümüzü ortaya qoymaq, baş məşqçinin verdiyi tapşırıqları yerinə yetirməkdi. Mən şəxsən komandaya inanıram, güvənirəm. Hər şey bizim üçün yaxşı olacaq.

- “Qəbələ”ni avrokuboklara hazır hesab etmək olar? Futbolçuların təcrübəsizliyi komandanın uğurlu çıxışına mane olmaz?

- Təcrübə hər zaman lazımdı. Ancaq mən içi özüm qarışıq komandanı hazır hesab edirəm. Hər gün irəli getmək üçün məşqlərdə lazımınca çalışırıq. Düşüncəmiz yalnız irəli getməkdi.

- “Qəbələ”nin avrokuboklardakı rəqibinin “Dinamo”(Tbilisi) olacağını düşünürsən, yoxsa səncə, Andorranın “Enqordani” klubu olacaq? Hansı komanda ilə oynamaq istəyərdiniz?

- Heç bir komandadan qorxmuruq, hamısına hörmətlə yanaşıram. Rəqibimizin “Dinamo”, yoxsa “Enqordani” olması bizim üçün elə də fərq etməz. Meydana qələbə üçün çıxmalıyıq. Akademiyanın yetirmələri olaraq tarix yazmaq istəyirik.

- “Qəbələ”nin avrokuboklardakı məqsədi nədən ibarət olacaq? Qruplara qalmaq sizin üçün realdı?

- Hər kəs istəyərki ən pik nöqtəyə kimi irəliləsin, biz də həmçinin. Məqsədimiz, fikrimiz də var ki gücümüzlə meydanda can qoyub qələbə qazanıb irəli gedək. İnşallah qrupa da düşərik, niyə də yox?

Xəbəri paylaş