“Keşlə”dən Kamranın qəsdən oynamaması haqda iddialara reaksiya

"Keşlə" klubu Azərbaycan milli komandasının heyətində xəsarət alan qapıçı Kamran Ağayevin zədəsinin ciddi olmaması ilə bağlı yayılan iddialara münasibət bildirib.

Klubun mətbuat xidmətinin rəhbəri Səbuhi Məmmədov "Report"a açıqlamasında təcrübəli qolkiperin MRT müayinəsi nəticəsində sağlam olduğunun üzə çıxmasına dair xəbərləri təkzib edib.

Klub rəsmisi 32 yaşlı oyunçunun baldır nahiyəsindən zədələndiyini vurğulayıb və  yığmanın düşərgəsindən zədəli qayıdan qapıçının həkim nəzarətində olduğunu, hərəkət edərkən ayağında ağrılar olduğu üçün məşqlərə də qatıla bilmədiyini diqqətə çatdırıb. Topaz Premyer Liqasının 12-ci turunda "Qəbələ" ilə keçiriləcək matçda qapıda Davud Kəriminin duracağı bildirilib.

Qeyd edək ki, Kamran Ağayev UEFA Millətlər Liqasının 5-ci turunda Bakı Olimpiya Stadionunda Azərbaycan yığmasının Farer adalarını 2:0 hesabı ilə məğlub etdiyi matçında xəsarət alıb. İkinci hissədə əvəzlənən Ağayev Kosovoya 0:4 hesabı ilə uduzduqları qarşılaşmada iştirak edə bilməyib.