"Futbolçuların pullarını saymasınlar, əllərini daşın altına qoysunlar"

“Kosova həmin gün bizdən yaxşı oynadı qalib gəldi. Bizdən daha istəkli idilər”.

Bunu Futbolxeber.az saytına açıqlamasında millimizin keçmiş hücumçusu Samir Musayev deyib.

O, Azərbaycan millisinin uğursuz çıxışı haqda fikirlərini bildirib: “Bəzi futbolçuların bacardığından aşağı çıxış etməsi, rəqibin motivasiyası, istəyi, oyunu dəyişməyimizə mane oldu. Erkən qol da komandamızın oyununa mənfi təsir etdi. Əsl gücümüzü Qurban müəllim daha yaxşı bilir. Ancaq fikrimcə, zamanla biz daha yaxşı oynayacağıq. Çünki komanda indi futbol oynamağa başlayır hələ. Əsl gücümüzü gələcəkdə görəcəyik. Səbrli olsaq yaxşı yığma komanda görəcəyik”.

Musayev sonda millimizin gələcəkdə yaxşı nəticələr qazanacağına inandığını bildirib: “Bu sadəcə başlanğıcdı. İndiyə kimi yığma komandamız final mərhələsinə bu qədər yaxın olmamışdı. Ancaq bunu da yaşadıq. Bir vaxtlar klublarımız qrup mərhələsinə düşə bilmirdi. Ancaq 4-5 ildi ki, klublarımız stabil olaraq qruplarda çıxış edir. Millimiz final mərhələsinə çıxmaq üçün addım-addım irəliləyir. Mənim sözüm, futbolçuların pulunu sayan, boş-boş  danışanlaradı. Əgər millimizi belə fikirləşəndilərsə, Kosovada yığmanı bir azarkeş qarşılamazdı. İsti yerdə oturub komanda haqda ağzına gələni danışmaql olmur. Əlinizi daşın altına onlar da qoysun, yoxsa oturub futbolçunun pulunu saymasınlar. Deyiləsi çox sözüm var, zamanı gələndə deyəcəm”.